ကလေးမြို့တောင်ပိုင်းတွင် ပြင်သာစာသင်ကျောင်းယမန့်ညက ဖြစ်ပွားခဲ့သည့်အနီးကပ် တိုက်ပွဲတွင် ဗိုလ်ကြီး တစ်ဦးအပါအဝင် စစ်ကောင်စီတပ်နှင့်ပျူစောထီးပေါင်း ၁၂ ဦးသေဆုံးပြီး ၊ဒေသခံပြည်သူ့ကာကွယ်ရေးတပ်ဖက်မှ ၇ ဦးကျဆုံးခဲ့ကြောင်း ကလေးမြို့ပြည်သူကာကွယ်ရေးတပ်ဖွဲ့ (ပကဖ-ကလေး) ကထုတ်ပြန်သည်။
ကလေးမြို့၊ ပြင်သာစာသင်ကျောင်းတွင် တပ်စွဲထားသည် အကြမ်းဖက်စစ်ကောင်စီတပ်ကို ကလေးမြို့ပြည်သူကာကွယ်ရေးတပ် ၊ တပ်ရင်း ၆ နှင့် တပ်ရင်း ၇ တို့က ယမန်နေ့ညတွင် ဝင်ရောက်တိုက်ခိုက်ခဲ့ခြင်းဖြစ်သည်။
ထိုတိုက်ပွဲသည် အနီးကပ်တိုက်ပွဲဖြစ်ပြီး အကြမ်းဖက်စစ်ကောင်စီဘက်မှ ဗိုလ်ကြီးတစ်ဦးကို အနီးကပ်ပစ်သတ်နိုင်ခဲ့ကြောင်း ပ.က.ဖ(ကလေး)က ထုတ်ပြန်ထားသည်။
“ပြင်သာစာသင်ကျောင်းဝန်းထဲတွင်သူ့လူကိုယ့်လူရောနေချိန်တွင် ပကဖ တပ်ခွဲမှူးက စခဗိုလ်ကြီးတစ်ယောက်ကိုသေနတ်နဲ့တေ့ပစ်သတ်နိုင်ခဲ့ကြောင်း ဝမ်းသာကြည်နူးဖွယ်ရာ သတင်းကောင်းကို
ပြည်သူများ ဝမ်းသာကြည်နူး ပီတိထူးများ ခံစားနိုင်ကြပါစေရန် တင်ပြအပ်ပါသည်”ဟု ပ.က.ဖကလေးက ထုတ်ပြန်သည်။
Public Service Announcement
သေဆုံးသွားသောဗိုလ်ကြီးသည် ကလေးမြို့ ညောင်ပင်သာရပ်ကွက်မှ အငြိမ်းစားဗိုလ်ကြီး၏ သားဖြစ်ပြီး၊ ဖခင်ဖြစ်သူမှာလည်းကလေးမြို့တွင် နာမည်ကြီးဒလန်ဖြစ်သည်ဟု ပကဖ(ကလေး)မြို့ကတာဝန်ရှိသူများကပြောသည်။
အကြမ်းဖက်စစ်ကောင်စီက ပျူစောထီးနှင့် အကြမ်းဖက်စစ်ကောင်စီတပ်သားအလောင်း ၄လောင်းကို ယမန့်နေညပိုင်းတွင်ကလေးမြို့ကို ညတွင်းချင်းပြန်လည်သယ်ယူခဲ့သည်။
ထိုအပြင်အကြမ်းဖက်စစ်ကောင်စီတပ်က တောင်အူ၊ပြင်သာရွာသူရွာသားများကိုကျဆုံးခဲ့သည့် ဒေသခံပြည်သူ့ကာကွယ်ရေးတပ်သားများ၏ အလောင်းများကို အိမ်တိုင်းမှ မဖြစ်မနေလာကြည့်ခိုင်းခဲ့သည်ဟု ဒေသခံများကပြောသည်။
“သူရဲကောင်းတို့ ကို အောက်မေ့ သတိရနေမှာ အမှန်ပါ။လက်နက် ကောင်းတက်ဆင်နိုင်ရေး များများ ဝိုင်းလှူ ကြဖို့လဲ တိုက်တွန်း လိုပါတယ်”ဟု ဒေသခံတစ်ဦးကပြောသည်။
ယမန့်နေ့တိုက်ပွဲတွင် ပြင်သာမှ တပ် ရင်း၆တပ်စုမှူးတစ်ဦးနှင့် တပ်ရင်း ၆ နှင့် တပ်ရင်း ၇ မှ တပ်သား ၃ ဦးစီ စုစုပေါင်း ၇ ဦးကျဆုံးခဲ့ခြင်းဖြစ်သည်ဟု ပ.က.ဖ(ကလေး)ကထုတ်ပြန်ထားသည်။
ယမန့်နေတိုက်ပွဲတွင် ဒေသခံကာကွယ်ရေးတပ်များက အင်အား ၅၀ခန့်ဖြင့်စစ်ကောင်စီတပ်ကို ဝင်တိုက်ခဲ့ခြင်းဖြစ်ကြောင့်း ကလေး ပ.က.ဖ က ထုတ်ပြန်ထားသည်။
တိုက်ပွဲဖြစ်ပွားပြီးနောက်စစ်ကောင်စီတပ်က လက်နက်ကြီးများဖြင့်တစ်ညလုံး ရမ်းသန်းပစ်ခတ်နေကြောင်း ဒေသခံများကပြောသည်။
