အကြမ်းဖက်စစ်ကောင်စီ စစ်ကြောင်းထိုးလာ၍ ကနီမြို့နယ် ချင်းတွင်း မြစ်ကမ်းဘေးကျေးရွာဒေသခံများ ရွာလုံးကျွတ်ထွက်ပြေးနေရသည်ဟု ဒေသခံများက လူထုနွေဦးသို့ ပြောသည်။
ယနေ့(ဖေဖော်ဝါရီ ၁၉ရက်) ညနေ လေးနာရီခန့်အခြေအနေကို ဒေသခံများက ပြောကြားခြင်းဖြစ်သည်။
”ရွာဘက်ကို တက်လာလို့ ဘယ်သူမှမနေရဲကြဘူး။ အဘိုးကြီး အဘွားကြီးတွေရော မနေရဲလို့ ပြေးနေကြရပြီ။ဒီစစ်ခွေးတွေ စာနာစိတ်မရှိကြဘူး။ အရမ်းဒုက္ခရောက်တယ်”ဟု ဒေသခံတစ်ဦးကပြောသည်။
ချင်းတွင်းမြစ်ကမ်းဘေး ရွာသုံးရွာထက်မနည်းပြေးနေရပြီး ယခုတစ်ကြိမ်အပါအဝင် လေးလအတွင်း ဆယ်ကြိမ်မြောက် ထွက်ပြေးရခြင်းဟု ဒေသခံများကပြောသည်။
”ဘယ်ကို ပြေးရမယ်ဆိုတာ မသိဘူး။ ဒီလိုပဲကြုံရာမှာခဏနားပြီး အန္တရာယ်နဲ့ နီးရင် ထပ်ပြေးရမှာ” ဟုဒေသခံအမျိုးသမီးကြီးတစ်ဦးကပြောသည်။
ယနေ့ ထွက်ပြေးနေရသော ချင်းတွင်းမြစ်ကမ်းဘေးကျေးရွာများကို စစ်ကြောင်စီတပ်က လေကြောင်းမှ တိုက်ခိုက်ခဲ့ဖူးပြီး ဒေသခံအများ ထိခိုက်သေဆုံးခဲ့ဖူးသည်။
လက်နက်အင်အားမမျှ၍ ထိပ်တိုက်ရက်ဆိုင်ရန် ခက်ခဲနေသည်ဟု ဒေသခံပြည်သူ့ကာကွယ်ရေးအဖွဲ့များကပြောသည်။
ထိုအပြင် ကနီမြို့နယ်အတွင်းဖေဖော်ဝါရီ ၁၈ ရက်ညမှစ၍ အကြမ်းဖက်စစ်ကောင်စီတပ်နှင့် ဒေသခံကာကွယ်ရေးတပ်တို့တိုက်ပွဲဖြစ်ပွားပြီး ယနေ(ဖေဖော်ဝါရီ ၁၉) ရက်တွင်လည်းတိုက်ပွဲထပ်မံဖြစ်ပွားရာ စစ်ကောင်စီတပ်က ဘုတလင်မြို့ မြသိန်းတန်ဘုရားကုန်းမှ လက်နက်ကြီးဖြင့်ပစ်ခတ်၍ဒေသခံကျေးရွာများထွက်ပြေးနေရကြောင်းဒေသခံများကပြောသည်။ တိုက်ပွဲများနှင့် စစ်ကောင်စီတပ်က လက်နက်ကြီးဖြင့် ပစ်ခတ်သောကြောင့် ဝက်ချောင်းလေး၊ ဝက်ချောင်းကြီး၊ အေးသာယာ၊ နတ်ကြီး၊ ဂွေးပင်၊ ရွာသာ၊ ချိုင်ရွာ စသောကျေးရွာများမှ ဒေသခံ တစ်ထောင်နီးခန့်မှာ နီးစပ်ရာ သစ်တောများအတွင်းထွက်ပြေးနေရကြောင်းသိ့ရသည်။
Public Service Announcement
