ဒုဗိုလ်မှုးကြီးနှစ်ဦး ပြည်သူ့ဘက်ကူးပြောင်းရပ်တည်လာပြီး ထပ်မံကူးပြောင်းလာမည့် အရာရှိများလည်းရှိ​နေ

▪️အကြမ်းဖက်စစ်ခေါင်းဆောင်မင်းအောင်လှိုင်နှင့် စစ်ကောင်စီအပေါ် မယုံကြည်မှုများ ပိုမိုများပြားလာဟု တပ်တွင်းရင်းမြစ်များပြော

တပ်မတော်မှ ဒုတိယဗိုလ်မှူးကြီးအဆင့် အရာရှိနှစ်ဦး ပြည်သူ့ဘက်ပြောင်းလဲရပ်တည်လာပြီး ထပ်မံကူးပြောင်းလာမည့်အရာရှိများလည်းရှိနေကြောင်း CDM တပ်မတော်သား ကိုညီသုတက ပြောသည်။

ယခင်က ပြည်သူ့ဘက်ကူးပြောင်းလာသည့် အမြင့်ဆုံးမှာ ဗိုလ်မှူးအဆင့်ဖြစ်ပြီး လက်ရှိတွင် ဒုတိယဗိုလ်မှူးကြီးအဆင့်အထိ ပါဝင်လာခြင်းဖြစ်သည်။

“ဒီအဆင့်တွေဟာ ပုံမှန်အားဖြင့်ဆိုရင် ထွက်ဖို့ခက်တယ်။ သူတို့ထဲမှာလည်း ဒီလိုပဲ ကြိုတင်တိုင်ပင်ဆွေးနွေးတဲ့သူတွေ ထပ်ရှိသေးတယ်။ တချို့ကတော့ လုပ်ဖို့ရာ ချိန်ဆနေတာတွေရှိတယ်။ ဒီလိုမျိုး ဒုတိယဗိုလ်မှူးကြီးအဆင့်တွေ ဖြစ်လာတဲ့အခါမှာ ဒီလိုပဲ ဒုတိယဗိုလ်မှူးကြီးအဆင့်တွေ၊ သူ့အောက်က အဆင့်တွေက ဒီထက်ပိုပြီးထပ်ပြီးထွက်လာဖို့အတွက် တွန်းအားတစ်ခုပါပဲ”ဟု ဗိုလ်ကြီးအဆင့်အထိ တာဝန်ထမ်းဆောင်ခဲ့သူ ကိုညီသုတက ပြောသည်။

Public Service Announcement

တပ်တွင်း သတင်းရင်းမြစ်များ၏ ပြောဆိုချက်အရ အကြမ်းဖက်စစ်ခေါင်းဆောင် မင်းအောင်လှိုင်နှင့် စစ်ကောင်စီအပေါ် မယုံကြည်မှုများ ပိုမိုများပြားလာပြီး ရှေ့တန်းစခန်းများတွင်လည်း စွန့် ခွာလိုသူများ ရှိနေ သည်ဟု ဆိုသည်။

“အခု ဒုတိယဗိုလ်မှူးကြီးအဆင့်တွေတောင်ထွက်လာကြပြီပဲဗျာ။ အောက်မှာရှိနေတဲ့ စီနီယာ၊ ဂျူနီယာတွေကတော့ လုပ်သင့်နေပြီ။ သူတို့လည်းသိပါတယ်။ အကြောင်းအမျိုးမျိုးကြောင့်၊ အခက်အခဲတွေကြောင့် မလုပ်နိုင်တာရှိပါတယ်။ ဒါပေမဲ့ ကိုယ့်ထက်ရာထူးကြီးတဲ့သူတွေတောင် လုပ်နေပြီဆိုတော့ ကိုယ်ကရာထူးလည်းငယ်တယ်။ ကိုယ်က အခိုင်းခံဘ၀နဲ့ ၊ ထိုးကျွေးခံဘ၀နဲ့ ဆက်နေမလားဆိုတာ ဆုံးဖြတ်ကြပေါ့” ဟု ကိုညီသုတက တိုက်တွန်းသည်။

အမျိုးသားညီညွတ်ရေးအစိုးရ(NUG)ကလည်း အကြမ်းဖက်စစ်ခေါင်းဆောင်များအကျိုးစီးပွားအတွက် ကိုယ့်ပြည်သူကိုယ်ပြန်လည်သတ်ဖြတ်သော အလုပ်ကို ဆက်လက်လုပ်ဆောင်မည့်အစား ပြည်သူလူထုဘက်ကို ရဲဝံ့စွာကူးပြောင်းရပ်တည်ရန် တိုက်တွန်းထားသည်။

လက်ရှိတော်လှန်ရေးအခြေအနေသည် စစ်ရေးအဆုံး အဖြတ်ဖြင့် ဆက်သွားရမည်ဖြစ်၍ မြေပြင်တွင်တော်လှန် ရေးအဖွဲ့ဝင်များက အသက်ပေးကာ နေ့မအား၊ ညမနားတောင့်ခံထားသည့်နည်းတူ ပြည်သူလူထုကလည်း ဆက်လက်ပံ့ပိုးမှုများ၊ လုပ်နိုင်သမျှသော ကူညီမှုများ ဆက်လက်လုပ်ဆောင်ရန် ကိုညီသုတက တောင်းဆိုသည်။

အကြမ်းဖက်စစ်​ကောင်စီကိုစွန့်ခွာ၍ ပြည်သူနှင့်ပူး​ပေါင်းလာ​​သောတပ်မ​တော်သားနှင့် ရဲတပ်ဖွဲ့ဝင် တစ်​သောင်းခွဲဝန်းကျင်ရှိလာပြီဖြစ်​ကြောင်း CDM တပ်မ​တော်သားနှင့်ရဲများကို ကူညီ​ပေး​နေ​​သောအဖွဲ့များထံမှ သိ့ရသည်။