ရုရှားရဲ့ ကျူးကျော်စစ်ကြောင့် ပျက်စီးသွားတဲ့ ကမ္ဘာ့အကြီးဆုံး လေယာဉ်ပျံကြီး

ကမ္ဘာပေါ်မှာ အရွယ်အစား အကြီးမားဆုံး လေယာဉ်ကြီးဟာ ယူကရိန်း လေဆိပ်တစ်ခုမှာ ရှိနေတုန်း မီးလောင် ပျက်စီးသွားခဲ့ပြီ ဖြစ်ပါတယ်။

AN-225 Mriyaကို ဆိုဗီယက်ခေတ်မှာ Antonov ကုမ္ပဏီက တည်ဆောက်ခဲ့ပါတယ်။ Mariyaဟာ နောက်ထပ် အမျိုးအစားတူ လုံးဝ ထပ်မတည်ဆောက်ဖြစ်တော့တာကြောင့် အမှန်တကယ် ပျံသန်းနိုင်တဲ့ တစ်စီးတည်းသော ကမ္ဘာ့အကြီးဆုံး လေယာဉ် ဖြစ်လာပါတယ်။

ဒီလေယာဉ်ကြီးဟာ ၈၄ မီတာ ရှည်လျားပြီး တောင်ပံနှစ်ဖက် အစွန်းတွေကြား ၈၈.၄ မီတာ ကျယ်ပါတယ်။ ဆိုဗီယက် ပြည်ထောင်စု ပြိုကွဲပြီးနောက်ပိုင်း ဒီလေယာဉ်ကြီးကို ယူကရိန်း နိုင်ငံက ပိုင်ဆိုင်လာပြီး ဒေါ်လာ သန်း ၂၀ ကျော် အကုန်အကျခံ ပြန်လည် ပြုပြင် မွမ်းမံခဲ့တဲ့နောက် ကုန်တန်ချိန် ၆၄၀ လောက်ထိ တင်ဆောင် ပျံသန်းနိုင်စွမ်း ရှိလာပါတယ်။

အခုအခါမှာတော့ ကိယက်ဗ် မြို့တော်နားက ဟော့စ်တိုမဲလ် လေတပ်စခန်းကို ရုရှားစစ်တပ်က တိုက်ခိုက်ခဲ့ချိန်မှာ Mriyaလည်း မီးလောင် ပျက်စီးသွားခဲ့ကြောင်း ယူကရိန်း အစိုးရက ကြေညာခဲ့ပါတယ်။ ပြီးတော့ လေဆိပ်ထဲက Mriya ထားရှိရာ လေယာဉ်ရုံကြီး ဆိုးဆိုးရွားရွား မီးလောင်ထားတဲ့ ဂြိုဟ်တု ဓာတ်ပုံတွေကိုလည်း ထုတ်ပြန် ပြသခဲ့ပါတယ်။

Public Service Announcement

လေယာဉ်ရုံကို ဒုံးကျည် တိုက်ရိုက် ထိမှန်ပြီး မီးလောင်ခဲ့သလား၊ ဒါမှမဟုတ် တိုက်ရိုက် ပစ်ခတ်ခံရတာ မဟုတ်ဘဲ မီးကူးစက်ခဲ့သလား ဆိုတာတော့ သေချာ မသိရသေးပါဘူး။

Mryiaဆိုတာဟာ ယူကရိန်း ဘာသာအရ အိပ်မက်လို့ အဓိပ္ပါယ် ရပါတယ်။ ယူကရိန်း နိုင်ငံခြားရေးဝန်ကြီး ဒီမစ်ထရို ကူလီဘာက ရုရှားဟာ Mriyaကို ဖျက်ဆီးလို့ ရပေမယ့် လွတ်လပ်တဲ့၊ ဒီမိုကရေစီ ပြည့်ဝတဲ့ ဥရောပ နိုင်ငံ တစ်ခုအနေနဲ့ ရပ်တည်ချင်တဲ့ ယူကရိန်း ပြည်သူတွေရဲ့ အိပ်မက်ကိုတော့ ဘယ်လိုမှ ဖျက်ဆီးနိုင်မှာ မဟုတ်ကြောင်း ပြောကြားသွားပါတယ်။