ယောဒေသ ၊ဆောမြို့နယ်အတွင်း တိုက်နယ်သုံးခုတွင် ပြည်သူ့အုပ်ချုပ်ရေးအဖွဲ့များ တိုးချဲ့ဖွဲ့စည်းလိုက်ကြောင်း ဆောမြို့နယ်ပြည်သူ့အုပ်ချုပ်ရေးအဖွဲ့က ကြေညာသည်။
ဆောမြို့နယ်အတွင်း ဆောတိုက်နယ်၊ကျောက်ထုတိုက်နယ်နှင့် လောင်းရှည်တိုက်နယ် အုပ်ချုပ်ရေးအဖွဲ့တို့အား တိုးချဲ့ဖွဲ့စည်းကြောင်း ယနေ့(ဖေဖော်ဝါရီ ၂၈ရက်)တွင် သတင်းထုတ်ပြန်ခြင်း ဖြစ်သည်။
ကြားကာလ ဒေသန္တရအုပ်ချုပ်ရေးလုပ်ငန်းများ စနစ်တကျဖြင့် ပိုမိုထိရောက် မြန်ဆန်စွာလုပ်ကိုင်နိုင်ရေး၊အများပူးပေါင်းပါဝင်မှုအား ကိုယ်စားပြုသူများဖြင့် ဖြန့်ကျက်အုပ်ချုပ်မှုစနစ်ဖြစ်ပေါ် ရေးတို့အတွက် ယင်းကဲ့သို့တိုးချဲ့ဖွဲ့စည်းခြင်းဟု ဆောမြို့နယ်ပြည်သူ့အုပ်ချုပ်ရေးအဖွဲ့က ကြေညာသည်။
တိုက်နယ်အလိုက်အုပ်ချုပ်ရေးအဖွဲ့များတွင်အုပ်ချုပ်ရေးတာဝန်ခံ၊ပြည်သူ့ကာကွယ်ရေးအဖွဲ့ (ပကဖ)တာဝန်ခံ၊ ပြည်သူ့လုံခြုံရေး(ပလဖ)တာဝန်ခံ၊လူမှုကယ်ဆယ်ရေးတာဝန်ခံ၊ ကျန်းမာရေးတာဝန်ခံနှင့်ပညာရေးတာဝန်ခံတို့ အဓိကပါဝင် ဖွဲ့စည်းထားသည်။
ပြည်သူ့အုပ်ချုပ်ရေးအဖွဲ့မြို့နယ်တာဝန်ခံများ၊တိုက်နယ်တာဝန်ခံနှင့် ကျေးရွာတာဝန်ခံများ၏ လုပ်ငန်း တာဝန်သက်တမ်းကာလသည် အမျိုးသားညီညွတ်ရေးအစိုးရ(NUG)သက်တမ်းကာလအထိသာဖြစ်ဟု ရှင်းပြထားသည်။