တနသာ်ရီတိုင်း၊ပုလောမြို့နယ်၊ ထမင်းမစားကျေးရွာအနီးတွင် ဒေသခံပြည်သူ့ကာကွယ်ရေးတပ်များနှင့် အကြမ်းဖက်စစ်ကောင်စီတပ်/ပျူစောထီးတို့ကြား နှစ်နာရီခန့်ကြာတိုက်ပွဲဖြစ်ပွားခဲ့ပြီး စစ်ကောင်စီ/ပျူစောထီးများ ထိခိုက်ဒဏ်ရာရရှိခဲ့သည်ဟု ပုလောမြို့နယ်-ပြည်သူ့ကာကွယ်ရေးတပ်ဖွဲ့ (PPDF)မှပြန်ကြားရေးတာဝန်ခံကပြောသည်။
ယနေ့(မတ်-၁ရက်) မနက် ၇နာရီမှ ၉နာရီခန့်အထိ တိုက်ပွဲဖြစ်ပွားခဲ့ခြင်းဖြစ်ဖြစ်ပြီး အကြမ်းဖက်စစ်ကောင်စီတပ်နှင့် ၎င်း၏လက်အောက်ခံပျူစောထီးများကို ပုလောမြို့နယ်ပြည်သူ့ကာကွယ်ရေးတပ်ဖွဲ့(PPDF)၊ ဒေသခံပုလောကာကွယ်ရေးအဖွဲ့(PRDF) တို့ကတိုက်ခိုက်ခဲ့ခြင်းဖြစ်သည်။
“ရွာထဲမှာရှိတဲ့ ပသစ (ပြည်သူစစ်) တွေထွက်လာအောင်အသံမိုင်းပေးလိုက်တာ။ပသစ တွေမိုင်းအသံကြားပြီးထွက်လာမှ အပြန်လှန်ပစ်ခတ်မှုဖြစ်တာပါ”ဟု PPDF ပြန်ကြားရေးတာဝန်ခံကတိုက်ပွဲ ဖြစ်ပွားပုံကိုပြောသည်။
ပြည်သူ့စစ်ခေါ် ပျူစောထီးများနှင့်တိုက်ပွဲဖြစ်ပွားနေချိန်တွင် ပလောင်တပ်နယ်မှ အကြမ်းဖက်စစ်ကောင်စီတပ် အင်အား ၃၀ခန့်က အရပ်ဝတ်ဖြင့် အိမ်စီးကားစီးကာ စစ်ကူရောက်လာသည်ဟု PPDFကထုတ်ပြန်သည်။
Public Service Announcement
“တိုက်ပွဲက ၂ခါဖြစ်တာ။ ပထမ အကြိမ်က ပျူစောထီးတွေနဲ့ အရင်တိုက်ပွဲဖြစ်တာ။ ဖြစ်နေတဲ့အချိန်မှာ စကစဘက်ကနေပြီးတော့ စစ်ကူလာတာ။ လာတဲ့စစ်ကူနဲ့ တိုက်ပွဲထပ်ဖြစ်တာပေါ့” ဟု ပုလော PDF ပြောရေးဆိုခွင့်ရှိသူက ပြောသည်။
တိုက်ပွဲတွင် ပျူစောထီးနှင့် စစ်ကောင်စီတပ်ဖွဲ့ဝင်အချို့ ဒဏ်ရာပြင်းထန်စွာရရှိခဲ့ပြီး ဒေသခံကာကွယ်ရေးတပ်များဖက်မှ အထိအခိုက်မရှိခဲ့ကြောင်းလည်း ၎င်းကဆက်ပြောသည်။
တိုက်ပွဲမှာထမင်းမစားကျေးရွာရှိ စာသင်ကျောင်းအနီးတဝှိုက်တွင်ဖြစ်ပွားခဲ့ပြီး လက်နက်ကြီးပစ်ခံသံများလည်းကြားရသည်ဟု ဒေသခံများကပြောသည်။
