ကရင်ပြည်နယ် ကော့ကရိတ်မြို့အနီးတွင် ကရင်အမျိုးသားအစည်းအရုံး(KNU)နှင့် အာဏာသိမ်းစစ်ကောင်စီတပ်တို့ ယနေ့မနက်က တိုက်ပွဲဆက်လက်ဖြစ်ပွားခဲ့ရာ နှစ်ဖက်ထိခိုက်ကျဆုံးမှုရှိခဲ့ကြောင်း ဒေသခံတစ်ဦးက ပြောသည်။
“သူတို့(စစ်ကောင်စီ)က ဖန်းကားကုန်း မောင်းမရွာသစ် အုပ်စုကနေ ကျော်ပြီးတော့ အံဖကြီး အုပ်စုကို ဝင်လာပြီးထိုးစစ်ဆင်တော့ ထိုးစစ်ဆင်တာ။ နှစ်ဖက်စလုံးထိခိုက်တယ်လို့ ကြားတယ်”ဟု ၎င်းက ဆိုသည်။
ထိခိုက်ကျဆုံးမှုအရေအတွက် အတိအကျကို မသိရသေးကြောင်း၊ လက်ရှိတွင် စစ်ကောင်စီတပ်များ အံဖကြီးရွာ၌ တပ်စွဲနေရာယူထားဆဲဖြစ်ကြောင်း ဒေသခံက ပြောသည်။
“ကော့ကရိတ်အခြေအနေက ဒီလိုမျိုးအနေအထားနဲ့ စစ်ကြောင်းလှုပ်ရှားမှုအပေါ်မှာတော့ ရေရှည်တိုက်ပွဲဖြစ်လာနိုင်တဲ့ အနေအထားရှိတာပေါ့။ ဒီလိုရေရှည်သွားမယ်ဆို စစ်ဘေးရှောင် ပြည်သူလူထုတွေပိုပြီး များများလာလိမ့်မယ်”ဟု ၎င်းက ဆိုသည်။
Public Service Announcement
ကော့ကရိတ်မြို့အနီးတဝိုက်နှင့် အာရှလမ်းတို့တွင် ယခုလအတွင်းတိုက်ပွဲများ မကြာခဏ ဖြစ်ပွားနေပြီး စစ်ဘေးရှောင်ပြည်သူလူထုများလည်း တိုးလာနေသည်ဟု ဒေသခံက ပြောသည်။
