ကရင်နီဒေသ တစ်ပတ်အတွင်းတိုက်ပွဲများ၌ စစ်ကောင်စီတပ်မှ ခုနစ်ဦးထက်မနည်းသေ

▪️စစ်ကောင်စီက တာဝေးပစ်အမြောက်များ၊ ဒုံးများဖြင့်တိုက်ခိုက်နေပြီး အင်အားဖြည့်တင်းနေဟု KNDF ထုတ်ပြန်

ကရင်နီဒေသတွင် မတ်လတတိယပတ်အတွင်း ဒေသခံ ကာကွယ်ရေးတပ်များနှင့် စစ်ကောင်စီတပ်တို့ တိုက်ပွဲများ ဆက်လက်ဖြစ်ပွားခဲ့ပြီး စစ်ကောင်စီတပ်မှ ခုနစ်ဦးထက်မနည်းသေဆုံးခဲ့ကြောင်း ကရင်နီအမျိုးသားများကာကွယ်ရေးတပ်(KNDF)က သတင်းထုတ်ပြန်သည်။

တစ်ပတ်အတွင်း တိုက်ပွဲသတင်းများကို KNDFက ထုတ်ပြန်ရာ ဖရူဆို၊ ဒီးမော့ဆို၊ လွိုင်ကော်၊ ရှမ်း -ကယားနယ်စပ် မိုးဗြဲဒေသတို့၌ တိုက်ပွဲများ ဆက်လက်ဖြစ်ပွားခဲ့ကြောင်း ဖော်ပြထားသည်။

ဖရူဆိုမြို့နယ် အခြေစိုက် ခမရ(၅၃၁)တပ်ကို မတ်လ ၁၇ရက်တွင် ကရင်နီတပ်မတော် (KA) နှင့် KNDF တို့မှ ရှောင်တခင် ဝင်ရောက်တိုက်ခိုက်ခဲ့ရာ အကြမ်းဖက်စစ်ကောင်စီတပ်ဖက်မှ တစ်ဦးသေဆုံးခဲ့ပြီး မတ်လ ၁၈ရက်တွင် ဖရူဆိုမြို့မရဲစခန်းနှင့် ခမရ (၅၃၁)တပ်အား ပြောက်ကျားတိုက်ခိုက်မှုပြုလုပ်ခဲ့ရာ အကြမ်းဖက်စစ်ကောင်စီတပ်မှ ​လေးဦးသေဆုံးခဲ့ပြီး ထိခိုက်ဒဏ်ရာရမှုများရှိခဲ့သည်ဟု ထုတ်ပြန်ထားသည်။

Public Service Announcement

မိုးဗြဲမြို့အနီး ဝါရီဆူးဖလိုင်ကျေးရွာတွင် တပ်စွဲထားသည့် စစ်ကောင်စီတပ်နှင့် KNDFတို့ မတ်လ ၁၈ရက်က ထိတွေ့တိုက်ပွဲဖြစ်ပွားရာ အဆိုပါတိုက်ပွဲအတွင်း စစ်ကောင်စီတပ်၏ ထိခိုက်သေဆုံးမှု အခြေအနေကို အတည်မပြုနိုင်ဟု ဆိုသည်။

မတ်လ ၁၉ရက် နံနက်တွင်လည်း လွိုင်ကော်မြို့နယ်၊ ကယန်းသာယာလမ်းခွဲအနီးရှိ စစ်ဆေးရေးဂိတ်အနီးတွင် ကရင်နီတပ်မတော်(KA)၊ KNDFနှင့် စစ်ကောင်စီတပ်တို့တိုက်ပွဲ နှစ်ကြိမ်ဖြစ်ပွားခဲ့ရာ စစ်ကောင်စီတပ်မှ နှစ်ဦးသေဆုံးခဲ့သည်ဟု ဖော်ပြထားသည်။

ထို့အပြင် လွိုင်ကော်မြို့နယ် လွယ်တမူ ကျေးရွာအနီး အဝေးပြးလမ်းတွင်လည်း မတ်လ ၂၁ရက် ညနေပိုင်းက KA/KNDFနှင့် စစ်ကောင်စီတပ် တိုက်ပွဲဖြစ်ပွားခဲ့ကြောင်း၊ မတ်လ ၂၂ရက် ညပိုင်းတွင် ဒီးမော့ဆို နန်းမယ်ခုံမြို့အနီး နန့်စံခန်းရွာ၌ စစ်ကောင်စီတပ်ကို KNDFက ပြောက်ကျား တိုက်ခိုက်ခဲ့ကြောင်း ထုတ်ပြန်သည်။

အဆိုပါတိုက်ပွဲသည် ၁နာရီခန့် ကြာမြင့်ခဲ့ပြီး စစ်ကောင်စီတပ်မှ သေဆုထိခိုက်မှုများရှိခဲ့ကြောင်း ဖော်ပြထား သည်။

စစ်ကောင်စီတပ်၏ တပ်မ(၆၆)စစ်ကြောင်းသည် ဒီးမော့ဆိုမြို့နယ် နောင်ပုလဲနှင့် ဆိုဘာသဲကျေးရွာများသို့ရောက်ရှိနေပြီး တာဝေးပစ်အမြောက်များ၊ ဒုံးများဖြင့် တိုက်ခိုက်မှုများအပြင် တပ်အင်အား ဖြည့်တင်းလျက်ရှိကြောင်း KNDFက ထုတ်ပြန်ခဲ့သည်။