ကြာအင်းဆိပ်ကြီးထဲက ရွာတစ်ရွာကို စစ်တပ်က လေကြောင်းနဲ့တိုက်ခိုက်

ကြာအင်းဆိပ်ကြီးမြို့နယ် ကျိတ်ကျေးရွာထဲကို စစ်ကောင်စီတပ်က လေကြောင်းတိုက်ခိုက်ခဲ့လို့ ဒေသခံတွေ ထိခိုက်မှုရှိပြီး တစ်ရွာလုံးနီးပါး ထွက်ပြေးတိမ်းရှောင်နေရတယ်လို့ ဒေသခံတွေက ပြောကြပါတယ်။

ကေအဲန်ယူ ဒူးပလာယာခရိုင် တပ်မဟာ ၆ နယ်မြေ ကြိတ်ကျေးရွာအနီးမှာရှိတဲ့ စစ်ကောင်စီရဲ့စခန်းတစ်ခုကို KNLA တပ်မဟာ ၆ က သွားရောက်တိုက်ခိုက်ခဲ့ရာကနေ တိုက်ပွဲတွေဖြစ်ပွားခဲ့ပြီး မနေ့က ညနေပိုင်းနဲ့ ဒီကနေ့ မနက်ပိုင်းမှာ စစ်ကောင်စီက လေယာဉ်နဲ့နှစ်ကြိမ် လာရောက်ပစ်ခတ်တိုက်ခိုက်ခဲ့တာပါ။

ဒီလိုတိုက်ခိုက်မှုကြောင့် လူထိခိုက်မှုတွေရှိနေပြီး နေအိမ်တွေလည်း ထိခိုက်ပျက်စီးသွားခဲ့သေးတယ်လို့ ဒေသခံတစ်ဦးက ဆိုပါတယ်။

“ကျိတ်ရွာမှာ လေယာဉ်နဲ့နှစ်ကြိမ်မြောက် ဗုံးကြဲခံရတယ်။ မနက်တုန်းကလည်း တစ်ကြိမ်။ ကျိတ်ရွာရဲ့ သာယာကုန်းဘက်ခြမ်းမှာ ကြဲချတာ။ လူကတော့ ဘယ်နှစ်ယောက်ထိလဲမသိဘူး။ ထိတော့ထိတယ်။ တစ်ရွာလုံးနီးပါး စစ်ရှောင်နေရတယ်”လို့ ဒေသခံတစ်ဦးက ဆိုပါတယ်။

Public Service Announcement

ကျိတ်ကျေးရွာအတွင်းမှာ အရင်က စစ်ကောင်စီတပ်စခန်းရှိခဲ့ပြီး နယ်မြေခံ KNLA တပ်မဟာ ၆ နဲ့ တိုက်ပွဲတွေမကြာခဏဖြစ်ပွားပြီးတဲ့နောက်ပိုင်း စစ်ကောင်စီက စခန်းကိုဆုတ်ခွာစွန့်ပစ်ခဲ့ရကာ နောက်ပိုင်းမှာတော့ ကျေးရွာအတွင်း ပြန်လည်အခြေချနေထိုင်ဖို့ ဒေသခံရွာသားတွေက လက်မခံတော့တဲ့အတွက် ရွာရဲ့အနီးက တောင်ကုန်းမှာ စခန်းချနေထိုင်ခဲ့ရတာဖြစ်ပါတယ်။

ပြီးခဲ့တဲ့နှစ် ဩဂုတ်လပိုင်းက ကျိတ်ကျေးရွာဒေသ တစ်၀ိုက်မှာ KNLA တပ်မဟာ ၆ နဲ့ စစ်ကောင်စီတပ်တို့အကြား တိုက်ပွဲတွေပြင်းထန်ခဲ့ပြီး အနီးအနားတစ်ဝိုက်က ကျေးရွာအများအပြားက ဒေသခံပြည်သူတွေဟာ လအတော်အကြာ စစ်ဘေးတိမ်းရှောင်နေခဲ့ရသေးတာဖြစ်ပါတယ်။