ချင်းပြည်နယ် မတူပီမြို့မှ ပလက်၀မြို့နယ်ဘက်သို့ ထွက်ခွာလာသည့် စစ်ကောင်စီတပ် စစ်ကြောင်းနှင့် သုံးကြိမ်တိုက်ပွဲဖြစ်ခဲ့ရာ စစ်ကောင်စီဘက်မှ အနည်းဆုံး ၁၀ဦးသေ၊ ငါးဦး ဒဏ်ရာရရှိခဲ့ကြောင်း မတူပီ ချင်းဒေသကာကွယ်ရေးတပ်(CDF)က ယနေ့ သတင်းထုတ်ပြန် သည်။
ဧပြီ ၉ရက်တွင် မတူပီမှ ပလက်၀မြို့သို့ စတင်ထွက်ခွာလာသည့် စစ်ကောင်စီတပ် စစ်ကြောင်းကို ဧပြီ ၁၀ရက်တွင် မိုင်တိုင်အမှတ် (၉)၌ တိုက်ခိုက်ခဲ့၍ စတင်တိုက်ပွဲဖြစ်ခဲ့သည်ဟု မတူပီ CDFက ဆိုသည်။ ယင်းတိုက်ပွဲ၌ စစ်ကောင်စီဘက်မှ အနည်းဆုံးနှစ်ဦး ဒဏ်ရာပြင်းထန်ခဲ့ပြီး မတူပီ CDF ဘက်မှ တစ်ဦး ဒဏ်ရာရခဲ့သည်ဟု ဖော်ပြထားသည်။
အဆိုပါ စစ်ကြောင်းသည် ဧပြီ ၁၁ရက်တွင် တွီရှစ်ကျေးရွာ၊ ၁၂ရက်တွင် ၀လံပီကျေးရွာ၊ ၁၃ရက်တွင် ကလားကျေးရွာ နှင့် ဧပြီ ၁၄ရက်တွင် ၀လံသဲကျေးရွာသို့ ရောက်ရှိလာကြောင်း ဖော်ပြထားသော်လည်း တိုက်ပွဲ ဖြစဉ် သုံးခုအနက် နှစ်ခုက မည်သည့်နေရာ မည်သည့်ရက်တွင် ဖြစ်ခဲ့သည်ကို ဖော်ပြမထားပေ။
စစ်ကောင်စီတပ်သည် လမ်းတစ်လျှောက်ရှိ ကျေးရွာပြည်သူပိုင် ကြက်၊ဝက်၊ဆိတ်များကို ယူဆောင်သွားသည့်အပြင် ၀လံပီရွာအတွက် စုဆောင်းသိမ်းဆည်းထားသည့် ပြည်သူပိုင် စပါးကျီများကို မီးရှို့ဖျက်ဆီးသွားသည်ဟု မတူပီ CDFက ဆိုသည်။
Public Service Announcement
မတူပီ – ပလက်၀ လမ်းပေါ်ရှိ ကျေးရွာနေ ပြည်သူ တစ်ထောင်ခန့် တောတောင်အတွင်း စစ်ဘေးတိမ်းရှောင်ခဲ့ရကြောင်း၊ စစ်ကောင်စီတပ်သည် မတူပီမြို့နယ်အတွင်းစစ်ကြောင်းထိုးမှုများ အဆတ်မပြတ်ပြုလုပ်နေ၍ ဆက်လက်ဆုတောင်း သတိရပေးရန် အထူးတိုက်တွန်းကြောင်း မတူပီ CDFက ထုတ်ပြန်သည်။
