စစ်ရေးအခြေအနေအရ နန်းဖဲ – ဘောလခဲလမ်းပိုင်း ဖြတ်သန်းသွားလာခြင်းမပြုရန် KNDF သတိပေး

▪️မေလ ၁၈ရက်ထိ တစ်လကြာသတ်မှတ်ထားပြီး ပြည်သူများလိုက်နာပေးရန် မေတ္တာရပ်ခံ

ဘောလခဲမြို့နယ် နန်းဖဲ- ဘောလခဲ လမ်းမကြီးအတွင်း အကြမ်းဖက်စစ်ကောင်စီတပ်များ စစ်ကြောင်းထိုးလျက်ရှိနေသောကြောင့် ရပ်ရွာရှိ ပြည်သူလူထုများ စစ်ဘေးရှောင်ပြည်သူများအနေဖြင့် ဧပြီ ၁၈ရက်မှ မေလ ၁၈ရက်အထိ လုံး၀ဖြတ်သန်းသွားလာခြင်း မပြုလုပ်ကြရန် ကရင်နီအမျိုးသားများကာကွယ်ရေးတပ်(KNDF) တပ်ရင်း -၁၆ က ယနေ့ ကြေညာချက်ထုတ်ပြန်သည်။

ပြည်သူလူထုများအားလုံး အထူးသဖြင့် ဘောလခဲမြို့နယ်အတွင်းရှိ ပြည်သူများလုံခြုံရေးအရ ဆောင်ရွက်နေဖြင်းဖြစ်၍ သတ်မှတ်ထားသည့်အချိန်ထိလုံး၀သွားလာခြင်းမပြုရန် အထူးမေတ္တာရပ်ခံကြောင်း ဖော်ပြထားသည်။

“နန်းဖဲမှာက စခ ဂိတ်လည်းရှိတယ်။အခု သူတို့ စစ်ကြောင်းထိုးနေတာက နယ်မြေ စိုးမိုးချင်လို့ပဲ လို့ အကြမ်းဖျင်း ပြောရမယ်။ကျန်တာတော့ ပြည်သူတွေအနေနဲ့ KNDF က သတိပေး ထုတ်ပြန်တာကို ကျေးဇူးပြုပြီး လိုက်နာပေးဖို့ လိုပါတယ်”ဟု KNDFမှ တာဝန်ရှိသူတစ်ဦးက People’s Spring သို့ ပြောသည်။

Public Service Announcement

ယခုရက်ပိုင်းအတွင်း ဖရူဆို – ဘောလခဲ လမ်းပိုင်း၌ စစ်ကောင်စီတပ်များက စစ်ကြောင်းထိုး လှုပ်ရှားမှုများရှိ၍ KNDF အပါအဝင် ကရင်နီပူးပေါင်းတပ်ဖွဲ့များက ခုခံတိုက်ခိုက်မှုများ လုပ်ဆောင်လျက်ရှိသည်။

ဧပြီ ၁၄ရက်က ဖရူဆိုမြို့နယ် ထားလဲနှင့် ဘောလခဲမြို့နယ် နန်းဖဲရွာအကြား စစ်ကြောင်းထိုးလာသည့် စစ်ကောင်စီတပ်ကို ကရင်နီပူးပေါင်းတပ်က မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ တပ်ရင်းမှူး ဝင်းထိုက်စိုးအပါအဝင် စစ်ကောင်စီတပ်များ မိုင်းထိခဲ့ပြီး ​လေးဦးသေဆုံးကာ သုံးဦးဒဏ်ရာရခဲ့ကြောင်း၊ တပ်မ(၆၆)၊ ခမရ (၁၀၈)တပ်ရင်းမှ တပ်ရင်းမှူး ဝင်းထိုက်စိုးမှာ ပြင်းထန်စွာဒဏ်ရာရ၍ လွိုင်ကော် စစ်ဆေးရုံ၌ ကုသလျက်ရှိရာ ဒဏ်ရာပြင်းထန်၍ သေဆုံးနိုင်ကြောင်း KNDFက ထုတ်ပြန်ထားသည်။

ဧပြီ ဒုတိယပတ်အတွင်း ကရင်နီပြည်နယ်အတွင်း တိုက်ပွဲများ၌ အကြမ်းဖက်စစ်ကောင်စီတပ်သား ၄၈ဦးထက်မနည်းသေဆုံးကာ ပြည်သူ့ကာကွယ်ရေး ရဲဘော် ၁၀ဦး ကျဆုံးခဲ့သည်။