အမေရိကန် ပြည်ထောင်စုဝါရှင်တန်ဒီစီမှာ မြန်မာ့အရေးအတွက် အာဆီယံ နိုင်ငံခြားရေးဝန်ကြီးတွေ မေလ ၁၁ ရက်ကတွေ့ဆုံဆွေးနွေးခဲ့ကြပါတယ်။
တွေ့ဆုံမှုမှာ အမေရိကန်နဲ့အာဆီယံကြား စီးပွားရေးပူးပေါင်းဆောင်ရွက်မှုကိုတိုးမြှင့်ဖို့ ၊ မြန်မာ့အရေးအပါအဝင် ဒေသတွင်းနဲ့ နိုင်ငံတကာအရေးတွေကို ထည့်သွင်း ဆွေးနွေးခဲ့ကြတယ်လို့စင်ကာပူနိုင်ငံခြားရေးဝန်ကြီးဗီဗီယန်ဘာလာ ခရစ်ရှနန်က သူ့ရဲ့ဖေ့ဘွတ်ခ်ကနေ အသိပေးထားပါတယ်။
အဲဒီတွေ့ဆုံမှုမှာ မြန်မာစစ်ကောင်စီက လွဲရင် အာဆီယံအဖွဲ့ဝင် နိုင်ငံခြားရေးဝန်ကြီးတွေတက်ရောက်တာတွေ့ရပါတယ်။စစ်ကောင်စီကိုတော့ ဘုံသဘောတူညီချက် တွေကိုအကောင်အထည်ဖော်ဖို့ပျက်ကွက်တဲ့အတွက် အစည်းအဝေးမှာ ဖိတ်ကြားခြင်းမရှိပါဘူး။
နိုင်ငံရေးအရ ကိုယ်စားမပြုသူကိုဖိတ်တဲ့အတွက် စစ်ကောင်စီကလည်းမတက်ရောက်ဘူးလို့သိရပါတယ်။ ဒါပေမယ့် အမေရိကန် − အာဆီယံ ထိပ်သီးအစည်းအဝေး ကျင်းပမယ့် အချိန်မှာပဲ NUG အစိုးရရဲ့ နိုင်ငံခြားရေးဝန်ကြီး ဒေါ်ဇင်မာအောင်ဟာ အမေရိကန် ပြည်ထောင်စုကိုရောက်ရှိနေတယ်လို့ RFA သတင်းဌာနက ဖော်ပြထားတာတွေ့ရပါတယ်။
Public Service Announcement
ဒီနေ့မှာပဲ အမေရိကန်သမ္မတ ဘိုင်ဒန်နဲ့ အာဆီယံ နိုင်ငံတွေရဲ့အစိုးရအဖွဲ့ ခေါင်းဆောင်တွေ တွေ့ဆုံဆွေးနွေးဖို့ရှိပါသေးတယ်။
အမေရိကန်အစိုးရရဲ့ အင်ဒို − ပစိဖိတ်ရေးရာ ညှိနှိုင်းဆောင်ရွက်ရေးမှူး ကာ့ကမ့်ဘဲလ်က အာဆီယံ ဟာ မြန်မာ့အရေးမှာနက်နက်ရှိုင်းရှိုင်းပါဝင်ဆောင်ရွက်သင့်တယ်လို့ ထိပ်သီးဆွေးနွေးပွဲမတိုင်ခင် အမေရိကန် ငြိမ်းချမ်းရေး အင်စတီကျုရဲ့ ဆွေးနွေးပွဲတစ်ခုမှာ ထည့်သွင်းပြောခဲ့ပါတယ်။
ဒီနေ့မှာ တွေ့ဆုံမယ့် အမေရိကန် − အာဆီယံ ထိပ်သီးဆွေးနွေးပွဲမှာ မြန်မာ့အရေး ၊ အာဆီယံဒေသတွင်း သြဇာဖြန့်ကျက်လာတဲ့တရုတ်အရေးနဲ့ ယူကရိန်းအရေးတွေကို ဆွေးနွေးကြမှာဖြစ်ပါတယ်။
