ရေဦးမြို့နယ်တွင် စစ်ကောင်စီတပ်က ပြည်သူ့ကာကွယ်ရေးတပ်ဝတ်စုံများဝတ်ဆင်ပြီး ကျေးရွာများကို ဝင်ရောက်ဖျက်ဆီးနေဟု သတိပေး

စစ်ကိုင်းတိုင်း၊ ရေဦးမြို့နယ်တွင် စစ်ကောင်စီတပ်က ဒေသတွင်းပြည်သူ့ကာကွယ်ရေးအဖွဲ့ဝတ်စုံများဝတ်ဆင်ပြီး ကျေးရွာများကို ဝင်ရောက်ဖျက်ဆီးနေကြောင်း ပြည်သူ့ကာကွယ်ရေးအဖွဲ့-ရေဦးက ပြောသည်။

အကြမ်းဖက်စစ်တပ်သည် ယမန်နေ့က ရေဦးမြို့နယ်၊ မုံတိုင်ပင်ရွာသို့ရောက်ရှိစဥ် ပကဖနှင့် PDFယူနီဖောင်းအချို့ကို ရရှိသွားခဲ့ခြင်းဖြစ်ကြောင်း ရေဦး(ပကဖ)အဖွဲ့က ပြောသည်။

ယနေ့(မေလ ၁၂ ရက်) နံနက်ပိုင်း၌ ထိုယူနီဖောင်းများကိုဝတ်ဆင်ကာ PDFအယောင်ဆောင်ပြီး အင်ပင်အုပ်စုရှိကျေးရွာများသို့ ဝင်ရောက်ဖျက်ဆီးနေခြင်းဖြစ်ကြောင်း၊ အထင်အမြင်မလွဲစေရန် တင်ပြခြင်းဖြစ်သ​ည်ဟု ရေဦး-ပကဖက ပြောသည်။

အကြမ်းဖက်စစ်တပ်သည် မုံတိုင်ပင်ရွာကို မေလ ၁၀ ရက်က လက်နက်ကြီးများဖြင့်ပစ်ခတ်ကာ မီးရှို့ဖျက်ဆီးခဲ့ပြီး ရွာအိမ်ခြေအများအပြား ပါသွားခဲ့ကြောင်း ဒေသခံများက ပြောသည်။

Public Service Announcement

“ရွာတွေထဲကို သူတို့မယား​တွေခေါ်လာပြီး လိုချင်တာ​တွေယူ မလိုချင်တာ​တွေ ဖျက်ဆီး​ပြီး
အိမ်​တွေကိုမီးရှို့​တာ”ဟု ရေဦးနယ်ခံတစ်ဦးက ပြောသည်။

မေလ ၇ရက်က ရေဦးမြို့နယ်၊ ဆီဆုံရွာမှ ဆင်ခြံရွာသို့ကူးလာသည့် အကြမ်းဖက်စစ်တပ်အား ဒေသခံတော်လှန်ရေးအဖွဲ့၊ ပကဖ နှင့် PDFတို့ပူးပေါင်းပြီး လက်လုပ်အဝေးပစ်များဖြင့် ကြားဖြတ်ပစ်ခတ် တိုက်ခိုက်ခဲ့သည်။