ဒီးမော့ဆိုမြို့နယ်တွင် စစ်ကောင်စီတပ် ထောင်ထားခဲ့သည့်မိုင်းများကို KNDF ရှင်းလင်း

ကရင်နီ(ကယား)ပြည်နယ်၊ ဒီးမော့ဆိုမြို့နယ်တွင် စစ်ကောင်စီတပ် ထောင်ထားခဲ့သည့် မိုင်းများကို ဖယ်ရှားရှင်းလင်းခဲ့ကြောင်း ကရင်နီအမျိုးသားများကာကွယ်ရေးတပ်(KNDF) တပ်ရင်း – ၅က ယနေ့(ဇွန် ၂၂ ရက်)တွင် ထုတ်ပြန်သည်။

ကရင်နီတပ်မတော် (KA)နှင့် KNDF ပူးပါင်းအဖွဲ့သည် ယမန်နေ့(ဇွန် ၂၁ ရက်) ညပိုင်းက ဥခူးရီကျေးရွာအတွင်း နယ်မြေရှင်းလင်းရေးပြုလုပ်စဥ် စစ်ကောင်စီတပ်များထောင်ထားခဲ့သည့် မိုင်းများကိုတွေ့ရှိခဲ့ပြီး ရှင်းလင်းဖယ်ရှားခဲ့သည်ဟု ဆိုသည်။

ကျေးရွာအတွင်းရှိ နေအိမ်များ၊ ရေတွင်းများနှင့် ကျေးရွာလမ်းများအနီး စစ်ကောင်စီတပ်က ထောင်ထားခဲ့သည့် လက်လုပ်မိုင်းအမျိုးအစား ၁၈လုံး တွေ့ရှိခဲ့သည်။

ပြီးခဲ့သည့် ဇွန်လ ၁၅ ရက်ကလည်း စစ်ကောင်စီတပ်များက ဖရူဆိုမြို့နယ်၊ ဒေါညေးခူကျေးရွာရှိ ကက်သလစ်ဘုရားရှိခိုးကျောင်းရှေ့တွင် မိုင်းထောင်ထားခဲ့၍ ကရင်နီရဲဘော်တစ်ဦး ခြေတစ်ဖက်ဆုံးရှုံးခဲ့ရသည်။

Public Service Announcement

ကရင်နီပြည်နယ်အတွင်း အကြမ်းဖက်စစ်ကောင်စီတပ် ၏ မြေမြှုပ်မိုင်း၊တိုက်မိုင်းများစွာ အသုံးပြုထားသည့်အတွက်ကြောင့် ဒေသခံပြည်သူများလည်း မကြာခဏ မိုင်းမိ၍ သေဆုံးထိခိုက်မှုများ ရှိနေသည်။

ထို့ကြောင့် စစ်ဘေးရှောင်နေရဆဲဖြစ်သော ကရင်နီပြည် နယ်ရှိ ဒေသခံများအနေဖြင့် နေရပ်သို့မပြန်သေးရန် ကရင်နီတပ်ပေါင်းစုများက တိုက်တွန်းထားသည်။