ကရင်အမျိုးသားအစည်းအရုံး(KNU) ဦးဆောင်ဖွဲ့စည်းထားသည့် ကော်ဘရာစစ်ကြောင်း၏ ဒရုန်းအသုံးပြု တိုက်ခိုက်မှုကြောင့် စစ်ကောင်စီတပ်မှ သေဆုံးထိခိုက်များပြားခဲ့ကြောင်း ကော်ဘရာစစ်ကြောင်းက ယနေ့ညနေပိုင်း၌ သတင်းထုတ်ပြန်သည်။
မြ၀တီမြို့နယ် ဖလူးဒေသရှိ စစ်ကောင်စီတပ်သည် ဇူလိုင် ၇ရက်မှ ၉ရက်အတွင်း ဟောင်ဝစ်ဇာ တောင်ပေါ်ပစ်အမြှောက်လက်နက်များ အသုံးပြု၍ မြဝတီ – ဝေါ်လေ ကားလမ်းမတစ်လျောက်အား ရမ်းသမ်းပစ်ခတ်လျက်ရှိကြောင်း ဖော်ပြထားသည်။
ထိုသို့ပစ်ခတ်မှုကြောင့် ကော်ဘရာစစ်သည်များ ထိခိုက်ကျဆုံးမရှိကြောင်း၊ ကော်ဘရာ စစ်ကြောင်း၏လက်ရုံးတပ်ဖွဲ့များ ဖြစ်သော လက်နက်ကြီးစစ်သည်များ၊ ဒရုန်းစစ်သည်များမှ ပြန်လည် ခြေမှုန်းခဲ့ရာ ကားလမ်းမ တစ်လျှောက် သစ်တောများအတွင်း ပုန်းခိုနေသော အကြမ်းဖက်စစ်ကောင်စီစစ်ကြောင်းများထံ တိကျစွာတိုက်ရိုက်ထိမှန်ခဲ့ပြီး အများအပြား ထိခိုက် သေဆုံးနေသည်ကို တွေ့ရကြောင်း ထုတ်ပြန်သည်။
စစ်ကောင်စီတပ်သည် လေးကေ့ကော်ဒေသရှိ ကော်ဘရာစစ်ကြောင်း တပ်စွဲရာတောင်ကုန်းများဆီသို့ ဇွန်လ ၂၉ရက်မှစ၍ စစ်ကြောင်းထိုး၍ ဝင်ရောက်ထိုးစစ်ဆင်မှုများ ပြုလုပ်လျက်ရှိသည်။ ဇွန်လ ၂၉ ရက်မှ ဇူလိုင် ၂ရက်အတွင်း ညစဉ်လက်နက်ကြီး ပစ်ကူရယူပြီး ထိုးစစ်ဆင်ခဲ့သော်လည်း ကော်ဘရာစစ်သည်များ၏ တိုက်ခိုက်မှုကြောင့် ဖရိုဖရဲ ပြန်လည်ဆုတ်ခွာခဲ့ရကြောင်း ကော်ဘရာ စစ်ကြောင်းက ဖော်ပြထားသည်။ ဇူလိုင် ၆ရက် တိုက်ပွဲတွင်လည်း စစ်ကောင်စီတပ်မှ အရာရှိအပါအဝင် သေဆုံးထိခိုက်သူ များပြားကြောင်း ကော်ဘရာ စစ်ကြောင်းက ထုတ်ပြန်ထားသည်။
Public Service Announcement
