စစ်ကောင်စီတပ် သေဆုံးထိခိုက်များခဲ့သည့် ဗန်းမောက်တောင်ပိုင်းကို လေကြောင်းကတိုက်ခိုက်

စစ်ကိုင်းတိုင်း ဗန်းမောက်မြို့နယ်တောင်ပိုင်းကို စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့ကြောင်း Banmauk Revolution က ဖော်ပြသည်။

ယမန်နေ့(ဇူလိုင် ၁၃ရက်) ညသန်းခေါင်ကျော်တွင် ဗန်းမောက်တောင်ပိုင်း သက်ကယ်တောင်ပေါ်သို့ ပြည်သူ့ကာကွယ်ရေးတပ်များရှိမည်အထင်ဖြင့် ဂျက်ဖိုက်တာ တစ်စီးမှ ဗုံးနှစ်လုံးကြဲချသွားသည်ဟု ဆိုသည်။

အဆိုပါ တိုက်ခိုကမှုကြောင့် ထိခိုက်မှုမရှိသော်လည်း ဗုံးကြဲသည့် အရှိန်ကြောင့် ဗန်းမောက်မြို့ရှိနေအိမ်များ တုန်ခါမှုရှိခဲ့သည်ဟု ဒေသခံကသတင်းပေးပို့လာကြောင်းဖော်ပြသည်။

ဗန်းမောက်တောင်ပိုင်းတွင် ဇူလိုင် ၁၂ရက်နှင့် ၁၃ရက်က စစ်ကောင်စီတပ်ကို ကချင်လွတ်လပ်ရေးတပ်မတော် (KIA)နှင့် ပြည်သူ့ကာကွယ်ရေးတပ်(PDF) ပူးပေါင်းတပ်က တိုက်ခိုက်ခဲ့ရာ စစ်ကောင်စီတပ်မှ ၅ဦးထက်မနည်းသေဆုံးခဲ့သည်ဟု ဆိုသည်။

Public Service Announcement

ယခင်လကတည်းက ဗန်းမောက်တောင်ပိုင်း၌ KIA/PDF ပူးပေါင်းတပ်နှင့် စစ်ကောင်စီတပ်တို့ တိုက်ပွဲများ ဖြစ်ပွားခဲ့ရာ စစ်ကောင်စီတပ်က အထိနာခဲ့သည်။

ပြည်သူများအနေဖြင့် လေကြောင်းတိုက်ခိုက်မှုများနှင့်ကြုံတွေ့လာပါက ထိခိုက်ကျိုးပဲ့လွယ်သော ပစ္စည်းများနှင့် ဝေးရာမှာနေရန်၊ ဝပ်၍သာနေရန်၊ နားထဲဂွမ်းသို့မဟုတ် အဝတ်စတခုခုဖြင့်ဆို့ထားရန်၊ လေယာဉ်သံပျောက်သွားမှ သွားလာလှုပ်ရှားကြရန် Banmauk Revolutionက သတိပေးထားသည်။