လူငယ်များနှင့် ကျောင်းသားများကို နိုင်ငံရေးပုဒ်မများဖြင့် တရားစွဲအမိန့်ချသည့် မင်္ဂလာတောင်ညွှန့်မြို့နယ် တရားသူကြီးကို ပစ်ခတ်ရှင်းလင်း

လူငယ်များနှင့် ကျောင်းသားများကို နိုင်ငံရေးပုဒ်မများဖြင့် တရားစွဲအမိန့်ချသည့် မင်္ဂလာတောင်ညွှန့်မြို့နယ် တရားသူကြီး ဦးစန်းလင်းအား ပစ်ခတ်ရှင်းလင်းခဲ့ကြောင်း အထူးတာဝန်လုပ်ငန်းအဖွဲ့ Special Task Agency of Burma(STA)အဖွဲ့က အသိပေးထားသည်။

ဇူလိုင် ၁၅ရက် ည ၇ နာရီခန့်တွင် တရားရုံးမှ ​နေအိမ်သို့ အငှားယာဉ်ဖြင့်ပြန်လာစဉ် ပစ်ခတ်ရှင်းလင်းခဲ့ကြောင်း STA မှ တာဝန်ရှိသူက ပြောသည်။

“ပစ်ခတ်မှုကြောင့် တရားသူကြီးချုပ် ဦးစန်းလင်း ပွဲချင်း ပြီးသေဆုံးပြီး အငှားယာဉ်မောင်းထိခိုက်ဒဏ်ရာရခြင်း မရှိခဲ့ပါ။မိမိတို့ အဖွဲ့သားများအနေဖြင့် အထိအခိုက်မရှိ အောင်အောင်မြင်မြင်ဆုတ်ခွာနိုင်ခဲ့ပါသည်”ဟု ၎င်းက​ပြောသည်။

STA အဖွဲ့အနေဖြင့် ဇူလိုင် ၁၅ရက် ညနေ ၄နာရီကလည်း လှိုင်သာယာမြို့နယ်တရားရုံးကို မိုင်းခွဲတိုက်ခိုက်ခဲ့ကြောင်း အထက်ပါတာဝန်ရှိသူက ပြောသည်။

Public Service Announcement

မိုင်းပေါက်ကွဲပြီးချိန်၌ အကြမ်းဖက်စစ်ကောင်စီတပ်ဖွဲ့ဝင်များ လာရောက်စစ်ဆေးခဲ့သော်လည်း အဖွဲ့သားအားလုံးဘေးကင်းကြောင်း ၎င်းက ဆိုသည်။

STAအဖွဲ့သည် စစ်အာဏာရှင်ကို အမြစ်ဖြတ်ချေမှုန်းရန် တိုက်ပွဲဝင်နေသော မြို့ပြစစ်သည်တော်များအဖွဲ့ဖြစ်ပြီး စစ်ကောင်စီနှင့် ၎င်းတို့၏ထောက်တိုင်များကို ရှင်းလင်းမှုများ ဆက်တိုက်ပြုလုပ်နေသည်။