စစ်ကောင်စီ၏ သေဒဏ်ပေးကွပ်မျက်မှုကို ကမ္ဘာ့ထိပ်သီးခုနှစ်နိုင်ငံအဖွဲ့(G7)က ပြင်းထန်စွာရှုတ်ချလိုက်ပြီး ထပ်မံ၍ ထင်တိုင်းကြဲကွပ်မျက်မှုများကို ရှောင်ကြဉ်ရန် တောင်းဆိုလိုက်သည်။
ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်၊ ဗြိတိန်၊ အမေရိကန် နိုင်ငံခြားရေးဝန်ကြီးများနှင့် ဥရောပသမဂ္ဂ အဆင့်မြင့်ကိုယ်စားလှယ်တို့က ယနေ့ထုတ်ပြန်လိုက်သော ကြေညာချက်၌ မြန် မာစစ်တပ်၏ အာဏာသိမ်းမှုကို ဆက်လက်၍ အပြင်းထန်ဆုံးကန့်ကွက်ရှုတ်ချကြောင်း ဖော်ပြ သည်။
ဦးဂျင်မီ၊ ဦးဖြိုးဇေယျာသော်၊ ဦးအောင်သူရဇော်၊ ဦးလှမျိုးအောင်တို့၏ မိသားစုဝင်များ၊ ၂၀၂၁ ဖေဖော်ဝါရီတွင် စစ်တပ်၏ တရားမဝင်အာဏာသိမ်းမှုအပြီးကတည်းက သတ်ဖြတ်ခံရသူ၊ ဖမ်းဆီးခံရသူ သို့မဟုတ် နှိပ်စက်ခံရသူအားလုံး၏ မိသားစုဝင်များနှင့် အတူခံစားရကြောင်း G7 နိုင်ငံခြားရေးဝန်ကြီးများက ထုတ်ပြန်သည်။
ထို့နောက် နိုင်ငံအတွင်း နိုင်ငံရေး၊ စီးပွားရေး၊ လူမှုရေး၊ လူသားချင်းစာနာမှုနှင့် လူ့အခွင့်အရေး အခြေအနေများအပေါ် အထက်ပါ G7 နိုင်ငံခြားရေးဝန်ကြီးများက လွန်စွာစိုးရိမ်ကြောင်းဖော်ပြသည်။
Public Service Announcement
မြန်မာစစ်တပ်သည် အကြမ်းဖက်မှုများလုပ်ဆောင်နေမှုကို ချက်ချင်းရပ်တန့်ရန်၊ ထပ်မံ၍ ထင်တိုင်းကြဲကွပ်မျက်မှုများကို ရှောင်ကြဉ်ရန်၊ နိုင်ငံရေးအကျဉ်းသားအားလုံးနှင့် တရားလက်လွတ်ထိန်းသိမ်းဖမ်းဆီးထားသူများကို ပြန်လွှတ်ပေးရန်၊ နိုင်ငံကို ဒီမိုကရေစီလမ်းကြောင်းပေါ် ပြန်သွားရန်စသည့် အချက်များကို ဆက်လက်တောင်းဆိုသည်။
G7 နိုင်ငံခြားရေးဝန်ကြီးများသည် အာဆီယံနှင့် ကုလသမဂ္ဂ၏ မြန်မာ့အရေးကြိုးပမ်းအားထုတ်မှုများကို ဆက်လက်အားပေးထောက်ခံပြီး မြန်မာစစ်တပ်အနေဖြင့် အာဆီယံဘုံဆုံးဖြတ်ချက် ၅ ရပ်ကိုအကောင်အထည်ဖော်ရန် တောင်းဆိုသည်။
