ကရင်နီ(ကယား)ပြည်နယ်၊ ဒီးမော့ဆိုမြို့နယ်အတွင်းစစ်ကောင်စီတပ်စွဲထား သည့် ကျေးရွာများအတွင်း ဒေသခံပြည်သူများပြန်လည်အခြေချနေထိုင်ခြင်းမပြုရန် အပါအဝင် ပြည်သူများလိုက်နာရန်အချက်လေးချက်ကိုကရင်နီအမျိုးသားများကာကွယ်ရေးတပ် KNDF ကယနေ့(သြဂုတ်၉ရက်)တွင်ထုတ်ပြန်သည်။
ဒီးမော့ဆိုမြို့နယ်အတွင်း KNDF နှင့် မဟာမိတ် တပ်များက အကြမ်းဖက်စစ်ကောင်စီကို နေ့စဥ် နှင့်အမျှ တိုက်ခိုက်နေသည်ဟုအသိပေးထားသည်။
ထို့ကြောင့် “ဒီးမော့ဆိုမြို့နယ်အတွင်း အရေးပေါ် သတိပေးထုတ်ပြန်ချက်”အဖြစ် စစ်ကြောင့်ထွက်ပြေး တိမ်ရှောင်နေရသော လူထုများ၊ကျေးရွာတွင် ပြန်လည်အခြေ ချလိုသော လူထုများအနေဖြင့် လိုက်နာရမည့်သတ်မှတ်ချက်လေးချက်ကို KNDF ကအသိပေးသည်။
လက်ရှိ ဒီးမော့ဆိုမြို့နယ်အတွင်း အကြမ်းဖက်စစ်ကောင်စီတပ်စွဲထားသော ကျေးရွာများတွင် ပြန်လည်အခြေ ချနေသော ကျေးရွာသူ၊ရွာသား များအနေဖြင့် အတက်နိုင်ဆုံးကျေးရွာများမှ ထွက်ခွာကြရန်၊အကြမ်းဖက်စစ်ကောင်စီတပ်ဖွဲ့ ဝင် များတပ်စွဲထားသည့် ကျေးရွာများတွင် ပြန်လည် အခြေ ချနေထိုင်ခြင်းမပြုလုပ်ရန်တိုက်တွန်းသည်။
Public Service Announcement
ထို့အပြင် ကျေးရွာသူရွာသားများအနေဖြင့် အကြမ်းဖက်စစ်ကောင်စီ၏ အချိုသတ်စည်းရုံသိမ်းသွင်းခြင်းကို အတက်နိုင်ဆုံးရှောင်ထွက်ရန် နှင့် ကျေးရွာလူကြီးအချို့နှင့်ရွာသူ၊ရွာသားအချို့မှလည်း အကြမ်းဖက်စစ်ကောင်စီ၏လုပ်ငန်းများတွင် ပူးပေါင်းဆောင်ရွက်ခြင်းကို လုံးဝ မပြုလုပ်ရန် KNDF က တားမြစ်သည်။
“ဒေသခံတွေရှိရင်ရှိသလိုအကြမ်းဖက်စစ်ကောင်စီကရိက္ခာတွေခိုးတယ်။ပြီးတော့ ပြည်သူတွေနေအိမ်ပေါ်တပ်စွဲတာတွေရှိနေတယ်။ဒါကြောင့် မလိုအပ်တဲ့ ဆုံးရှုံးမှုတွေမဖြစ်အောင် ကြိုတင်တိုက်တွန်းတာပါ”ဟု KNDF တပ်ဖွဲ့ဝင်တစ်ဦးက လူထုနွေဦးသို့ ပြောသည်။
တိုက်တွန်းတောင်းဆိုချက်များကို လိုက်နာ ဆောင်ရွက်ခြင်းမရှိပါက လုပ်ထုံးလုပ်နည်းများ နှင့်အညီ ဆောင်ရွက်သွားမည်ဟု KNDF က သတိပေးသည်။
ဇူလိုင်နောက်ဆုံးပတ်ကစ၍ ဒီးမော့ဆိုမြို့နယ် စံပြ(၆)မိုင်ဘက်သို့အင်အားအလုံးအရင်းဖြင့်စစ်ကောင်စီတပ်က ထိုးစစ်ဆင်နေသည်။
ထို့ကြောင့် ဒီးမော့ဆိုမြို့နယ်၊ သေးဆူလဲကျေး ရွာ၊ စံပြ (၆)မိုင် နှင့် ဘက်တလိန် ကျေးရွာတို့တွင် ယခုလ ပထမပတ်တွင် တိုက်ပွဲများပြင်းထန်ခဲ့ပြီး စစ်ကောင်စီတပ်က သေဆုံးသူများ ပြားခဲ့ကြောင်း KNDF ကထုတ်ပြန်ထားသည်။
