ကချင်ပြည်နယ် ဖားကန့်မြို့တွင် ပြည်သူ့ကာကွယ်ရေးတပ်(PDF) ရိက္ခာဂိုဒေါင် မီးရှို့ဖျက်ဆီးခံရပြီး ယင်းဂိုထောင်တွင်ရှိနေသည့် အမျိုးသားသုံးဦးထက်မနည်းကို စစ်ကောင်စီက ဖမ်းဆီးသွားသည်။
ဖားကန့် မြို့ မှော်ပုံကျေးရွာရှိ ဖားကန့်ပြည်သူ့ကာကွယ်ရေးတပ်၏ ရိက္ခာဂိုဒေါင်ကို စစ်ကောင်စီက ယမန်နေ့(သြဂုတ် ၂၆ရက်)ညတွင် ဝင်ရောက်စီးနင်းခဲ့ခြင်းဖြစ်ကြောင်း ဖားကန့်သပိတ်ခေါင်းဆောင်တစ်ဦးက ပြောသည်။
“မိုးတွေ သဲသဲမဲမဲရွာနေတဲ့အချိန် ည၁၁ နာရီလောက်က ဝင်စီးတာ။ အဖမ်းခံရတာ ၆ယောက်လို့ကြားပေမယ့် ပြန်ထွက်ပြေးလာသူတွေလည်း ရှိတယ်။ သုံးဦးကတော့ သေချာပေါက်ဖမ်းသွားတယ်”ဟု အထက်ပါပုဂ္ဂိုလ်က ပြောသည်။
ဖမ်းဆီးခံရသူများထဲတွင် ဖားကန့်မြို့နယ်လွှတ်တော်အမတ်ဟောင်း ဦးတင်စိုး၏ ယောက်ဖတော်စပ်သူ ဦးဇော်မင်းဦး ပါသွားသည်ဟု သတင်းရရှိသည်။
Public Service Announcement
” ဦးဇော်မင်းဦးကို သတ်လိုက်ပြီလို့ ကြားနေရတယ်။ သူ့အမျိုးသမီးက သတင်းလိုက်မေးရင်း ငိုနေတယ်ဗျာ”ဟု ဒေသခံတစ်ဦးက ပြောသည်။
ဦးတင်စိုးသည် ၂၀၁၅ ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်ပါတီကိုယ်စားပြုကာ အနိုင်ရခဲ့သည့် ဖားကန့်မြို့နယ်ပြည်သူ့လွှတ်တော်ကိုယ်စားလှယ်ဖြစ်သည်။ စစ်တပ်က အာဏာသိမ်းပြီးနောက် ဖမ်းဆီးခြင်းခံထားရသည်။
