စစ်ကိုင်းတိုင်း၊ ရွှေဘို – မန္တလေးလမ်းပေါ်တွင် ယနေ့မွန်းလွဲပိုင်းက အကြမ်းဖက်စစ်ကောင်စီယာဥ်တန်းအား မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ခြောက်ဦးထက်မနည်း သေဆုံးနိုင်ကြောင်း MDF-Shweboက သတင်းထုတ်ပြန်သည်။
ယနေ့ (သြဂုတ် ၂၇ ရက်) မွန်းလွဲ၂နာရီ ၄၅မိနစ်ခန့်က စစ်ကိုင်းမှရွှေဘိုမြို့သို့လာသော စစ်ကောင်စီတပ်၏ သုံးစီးပါယာဉ်တန်းအား ရွှေဘိုမြို့တောင်ဘက် စိုင်နိုင်ကွေ့အနီးတွင် မိုင်းဆွဲတိုက်ခိုက်ခဲ့ရာ စစ်ကားတစ်စီး ထိထိမိမိမိုင်းဆွဲတိုက်ခိုက်နိုင်ခဲ့ကြောင်း MDF-Shwebo၏ ထုတ်ပြန်ချက်တွင် ဖော်ပြသည်။
ယင်းမိုင်းဆွဲတိုက်ခိုက်မှုတွင် စစ်ကောင်စီတပ်သား ခြောက်ဦးနှင့်အထက်သေဆုံးခဲ့ပြီးတော်လှန်ရေးအင်အားစုများအထိခိုက်မရှိအောင်မြင်စွာ ဆုတ်ခွာနိုင်ခဲ့သည်ဟု ဆိုသည်။
အထက်ပါစစ်ဆင်ရေးအား ရွှေဘိုခရိုင်တပ်ရင်း (၂၃)၊ Shwebo Defense Force(SBDF)၊ ရွှေဂျိုးဖြူ ပျောက်ကျားတပ်ဖွဲ့နှင့် MDF-Shwebo တို့က ပူးပေါင်းလုပ်ဆောင်ခဲ့ကြောင်း အသိပေးထားသည်။
Public Service Announcement
ဖြစ်စဥ်နှင့်ပတ်သက်ပြီးMDF-Shweboအဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။ ထိခိုက်သေဆုံးမှုအခြေအနေနှင့်ပတ်သက်၍ People’s Springက ထပ်မံအတည်ပြုနိုင်ခြင်းမရှိသေးပေ။
ရွှေဘို – မန္တလေးလမ်းပေါ်၊ စိုင်နိုင်ကွေ့အနီးတွင် အကြမ်းဖက်စစ်တပ်ယာဥ်များ မကြာခဏမိုင်းဆွဲတိုက်ခိုက်ခံရလေ့ရှိပြီး ယခင်လပိုင်းအတွင်းကလည်း ထိုနေရာ၌ မိုင်းဆွဲခံရ၍ အကြမ်းဖက်စစ်သား သေဆုံးထိခိုက်မှုများ ရှိခဲ့သည်။
