စစ်ကိုင်းတိုင်း၊ စစ်ကိုင်းမြို့နယ်၊ စီတီးရွာ(စီတီးရပ်ကွက်)၏ စစ်ကောင်စီခန့် အုပ်ချုပ်ရေးမှူး ဦးကျော်နိုင်ဆိုသူ ယမန်နေ့က ပစ်ခတ်ခံရပြီး ပွဲချင်းပြီးသေဆုံးခဲ့ကြောင်း ဒေသတွင်း သတင်းရင်းမြစ်များက ပြောသည်။
ယမန်နေ့ (စက်တင်ဘာ ၁ရက်) နံနက် ၆နာရီ ၂၃ မိနစ်ခန့်က စစ်ကိုင်းမြို့ ကောင်းမှုတော်ဘုရားကြီးအရှေ့ဘက် မန္တလေး-စစ်ကိုင်း-ရွှေဘို-မုံရွာကားလမ်းမပေါ်တွင် စီတီးရပ်ကွက်အုပ်ချုပ်ရေးမှူး ဦးကျော်နိုင်သည် စျေးဝယ်ထွက်လာစဥ် သုံးချက်ပစ်ခတ်ခံရ၍ သေဆုံးခဲ့ခြင်းဖြစ်ကြောင်း ဒေသခံများက ပြောသည်။
စစ်ကိုင်းဒေသတွင်းအခြေစိုက် လင်းလက်ကြယ်အဖွဲ့က ပစ်ခတ်ခံရသူ ဦးကျော်နိုင်သည် စစ်ကောင်စီသတင်းပေး ဒလန်အကြီးစားဖြစ်ပြီး ရပ်ရွာအတွင်း သာရေး နာရေးပွဲများပြုလုပ်ရာ၌ ငွေကြေးတောင်းခံခြင်း၊ မြေကွက်များရောင်းရငွေမှ ရာခိုင်နှုန်းဖြတ်တောက်ကောက်ခံခြင်း၊ စစ်တပ်အရာရှိများနှင့်ပူးပေါင်းကာ အမှုပွဲစားပြုလုပ်ခြင်း၊ ပတ်ဝန်းကျင်ပြည်သူလုထုအပေါ် အနိုင့် အထက်စီးနင်းဆက်ဆံ ဗိုလ်ကျခြင်း၊ အာဏာရှင်ဆန့်ကျင်သူများ၏ သတင်းအချက်အလက် များကို ထောက်လှမ်းကာ စစ်တပ်အားပေးပို့ခြင်း၊ ဓာတ်ပုံသတင်းထောက်ဖြစ်သူ ကိုအေးကျော် သေဆုံးသတ်ဖြတ်မှုတွင် ပူးပေါင်းပါဝင်ခြင်းနှင့်ညဘက်များတွင် စစ်တပ်မှအရာရှိကြီးများနှင့်ပေါင်းကာ KTVများ၌ အနိုင်ကျင့် ဗိုလ်ကျကာ မိန်းကလေးငယ်များနှင့် ပျော်ပါးနေခြင်းတို့ကြောင့် ရှင်းလင်းခဲ့ခြင်းဖြစ်ကြောင်း ကြေညာချက်ထုတ်ပြန်ခဲ့သည်။
စစ်ကိုင်းမြို့နယ်အတွင်းရှိ ပျူများ၊အုပ်ချုပ်ရေးမှူးများအနေဖြင့် စစ်တပ်၏ အာဏာရှင်အလိုကျအတိုင်း ဆက်လက်လုပ်ဆောင်ကြပါက ၎င်းအုပ်ချုပ်ရေးမှူးသွားရာလမ်းအတိုင်း ပို့ဆောင်ပေးသွားမည်ဟု လင်းလက်ကြယ်အဖွဲ့ က သတိပေးသည်။
Public Service Announcement
