သမိုင်းမြို့သစ် ကျွန်းရွှေဝါလမ်းမှာ အပြန်အလှန်ပစ်ခတ်မှုဖြစ် စစ်ကောင်စီတပ်မှ နှစ်ဦးဒဏ်ရာရ၊ လူငယ်အချို့ဖမ်းဆီးခံရ

မရမ်းကုန်မြို့နယ် သမိုင်းမြို့သစ် (၁)ရပ်ကွက်မှာရှိတဲ့ ကျွန်းရွှေဝါလမ်းထဲမှာ ဒီကနေ့နံနက် ၁၀ နာရီဝန်းကျင်က အပြန်အလှန်ပစ်ခတ်မှုဖြစ်ပွားခဲ့တယ်လို့ သတင်းရရှိပါတယ်။

စစ်ကောင်စီတပ်တွေ ရပ်ကွက်ထဲဝင်ပြီး ရှာဖွေစစ်ဆေးမှုတွေလုပ်နေချိန် အပြန်အလှန်ပစ်ခတ်မှုဖြစ်ပွားခဲ့တာဖြစ်ပြီး စစ်ကောင်စီတပ်သားနှစ်ဦး ထိခိုက်ဒဏ်ရာရခဲ့တယ်လို့ ဒေသခံတစ်ဦးက ပြောပါတယ်။

“သူတို့(စစ်ကောင်စီတပ်)က မနက် ၉ နာရီလောက်က တည်းက ရပ်ကွက်ထဲဝင်မွှေနေတာ။ အင်အားလည်းများတယ်။ ကျွန်းရွှေဝါလမ်းရောက်တော့ အပြန်အလှန် ပစ်ကြတာလို့ သိရတယ်။ လောလောဆယ် ရပ်ကွက်အဝင်လမ်းတွေကို ပိတ်ထားတယ်”လို့ အခင်းဖြစ်ရပ်အနီးနေထိုင်တဲ့ ပြည်သူတစ်ဦးက ပြောပါတယ်။

စစ်ကောင်စီဘက်က စစ်ကားနဲ့ရဲကား အနည်းဆုံး ၇ စီးလောက်နဲ့ ရပ်ကွက်ထဲဝင်ရောက်လာတာဖြစ်ပြီး ပစ်ခတ်မှုဖြစ်စဉ်မှာ အရပ်သားလေးဦးဖမ်းဆီးခံရတယ်လို့ ကြားသိရတဲ့အကြောင်း မျက်မြင်တွေ့ရှိရသူကိုကိုးကားပြီး အထက်ပါပြည်သူတစ်ဦးက ဆက်ပြောပါတယ်။

Public Service Announcement

ပစ်ခတ်မှုဖြစ်ပွားခဲ့တဲ့ သမိုင်း(၁)ရပ်ကွက် ကျွန်းရွှေဝါလမ်းဟာမြို့သစ်ဘူတာအနီးမှာတည်ရှိတာဖြစ်ပြီး ဖြစ်စဉ်အသေးစိပ်ကိုတော့ မသိရှိရသေးပါဘူး။