ရှမ်းပြည်နယ်မြောက်ပိုင်း၌ ယမန်နေ့က ဖြစ်ပွားသည့်တိုက်ပွဲတွင် စစ်ကောင်စီတပ်က အထိနာ ၍ လေကြောင်းမှ တုန့်ပြန်တိုက်ခိုက်လျက်ရှိကြောင်း ကချင်လွတ်လပ်ရေးတပ်မတော်(KIA) သတင်းနှင့် ပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောသည်။
“မနေ့ကနေ ဖြစ်တာက ကျွန်တော်တို့ တပ်မဟာ(၆)၊ တပ်ရင်း (၉) နယ်မြေဘက်မှာ စစ်ကောင်စီဘက်က ထိုးဝင်လာလို့ ခုခံတိုက်ပွဲတွေ ရှိပါတယ်။အဲဒီနေရာမှာ မနေ့ကလည်း လေကြောင်းလာတယ်။ ဒီနေ့လည်း လေကြောင်းနဲ့ လာတိုက်တာရှိပါတယ်”ဟု ၎င်းက ပြော သည်။
KIA တပ်ရင်း (၉)နယ်မြေသည် ရှမ်းပြည်နယ်မြောက်ပိုင်း မူဆယ်နှင့် ကွတ်ခိုင်မြို့နယ်များ အတွင်း၌ တည်ရှိသည်။
“သူတို့ ထိုးဝင်လာတဲ့အချိန်မှာ ကျွန်တော်တို့ ခုခံတိုက်ပွဲဖြစ်တဲ့ အဲဒီနေ့ရက်မှာတော့ စစ်ကောင်စီဘက်က နည်းနည်း အထိနာတယ်လို့ ကြားပါတယ်။ အဲဒါကြောင့် သူတို့ကလည်း ပြန်ပြီးမှ စစ်ကြောင်းထပ်တိုးပြီးမှ ထိုးဝင်လာလို့ အခုတိုက်ပွဲတွေ ဖြစ်လာတဲ့ သဘောမျိုးရှိပါတယ်” ဟု ဗိုလ်မှူးကြီးနော်ဘူက ပြောသည်။
Public Service Announcement
ရှမ်းမြောက် မူဆယ် – လားရှိုး လမ်းပိုင်း၌ စစ်ကောင်စီတပ်က အင်အားများ ဖြည့်တင်းနေ၍ လားရှိုးနှင့် မူဆယ်အကြား၌ စက်တင်ဘာလဆန်း၌ တိုက်ပွဲဖြစ်ပွားမှုများ မကြာခဏရှိနေသည်ဟု နမ့်ဖက်ကာ ဒေသခံတစ်ဦးက ပြောသည်။
ကချင်ပြည်နယ်ဘက်တွင် KIAနှင့် စစ်ကောင်စီတပ်အကြား လတ်တလောတွင် စစ်ရေး အခြေအနေ ထူးခြားမှုမရှိသေးဟု ဗိုလ်မှူးကြီးနော်ဘူက ပြောသည်။ သို့ရာတွင် ကချင်ပြည်နယ် တနိုင်းမြို့နယ် လီဒိုလမ်း KIA တပ်ရင်း(၁၄) နယ်မြေဘက်တွင် စစ်ကောင်စီတပ်၏ စစ်ရေးလှုပ်ရှားမှုကို တွေ့ရသည်ဟု ဆိုသည်။
