ရှမ်းမြောက်တွင် စစ်ကောင်စီတပ်နှင့် မြောက်ပိုင်းအဖွဲ့ တိုက်ပွဲဖြစ်နေ

ရှမ်းပြည်နယ်မြောက်ပိုင်း မူဆယ်နှင့်နမ့်ခမ်းမြို့ပတ်ဝန်းကျင်တွင် မြောက်ပိုင်းမဟာမိတ်အဖွဲ့နှင့် စစ်ကောင်စီတပ်တို့ ယနေ့ နံနက်ပိုင်းတိုက်ပွဲဖြစ်ခဲ့ပြီးနောက် ညပိုင်း၌ ကွတ်ခိုင်နှင့်သိန္နီမြို့အနီး တိုက်ပွဲထပ်မံဖြစ်နေသည်ဟု ဒေသခံများက ပြောသည်။

“ကွတ်ခိုင်မှာက ည ၇နာရီခွဲလောက်ကစပြီး မြောက်ပိုင်းအဖွဲ့က လာတိုက်တာ။ သိန္နီမှာကျတော့ စစ်ကောင်စီက လက်နက်ကြီးနဲ့ပစ်နေတာ”ဟု ဒေသခံတစ်ဦးက ပြောသည်။

မူဆယ်၊ နမ့်ခမ်း၊ ကွတ်ခိုင်နှင့် သိန္နီမြို့သည် ရှမ်းပြည်နယ်မြောက်ပိုင်းမှ နယ်ချင်းစပ်မြို့နယ်များဖြစ်သည်။ မူဆယ်နှင့်နမ့်ခမ်းမြို့ပတ်ဝန်းကျင်တွင် ယနေ့(စက်တင်ဘာလ ၆ရက်) နံနက် ကိုးနာရီခန့်မှ ၁၁နာရီခန့်အထိ တိုက်ပွဲဖြစ်ခဲ့ပြီး ညနေဘက်တွင် တိုက်ပွဲဧရိယာ ကျယ်ပြန့်လာသည်ဟု ဒေသခံများက ပြောသည်။

“မြောက်ပိုင်းမဟာမိတ်အဖွဲ့ ဒီရက် ခပ်စိပ်စိပ်လှုပ်ရှားလာတယ်။ ရခိုင်မှာရော၊ ကချင်နဲ့ ရှမ်းပြည်နယ်မှာပါ တိုက်ပွဲအရှိန်မြှင့်လာတယ်လို့ ထင်တယ်”ဟု ရှမ်းမြောက်ဒေသခံတစ်ဦးက ဆိုသည်။ ယနေ့ည တိုက်ပွဲကြောင့် ထိခိုက်ပျက်ဆီးမှုကို မသိရသေးပေ။

Public Service Announcement

မြောက်ပိုင်းမဟာမိတ်အဖွဲ့တွင် ကချင်အမျိုးသားလွတ်မြောက်ရေးတပ်မတော် (KIA)၊ တအာင်းလွတ်မြောက်ရေးတပ်မတော်(TNLA)၊ ရခ်ိုင့်တပ်မတော်(AA)နှင့် ကိုးကန့်လွတ်မြောက်ရေးတပ်မတော်(MNDAA) တို့ ပါဝင်သည်။KIA အခြေစိုက်သည့် ကချင်းပြည်နယ်နှင့် AA အခြေစိုက်သော ရခိုင်ပြည်နယ်တွင်လည်း စစ်ကောင်စီနှင့်တိုက်ပွဲများ ဖြစ်ပွားနေသည်။