စစ်ကြောင်းဝင်လာသည်ကို ကင်းအဖွဲ့ကမြင်၍ ကြိုတင်ဆုတ်ခွာနိုင်ခဲ့ဟုဆို
ရေစကြိုမြို့နယ် ပြည်သူ့ကာကွယ်ရေးတပ်ဖွဲ့ (ပကဖ)က ပြည်သူ့ကာကွယ်ရေး တပ်ဖွဲ့ဝင်များအား သင်တန်းပေးလျက်ရှိသည့်စခန်းအား စစ်ကောင်စီတပ်က စစ်ကြောင်းထိုး ဝင်ရောက်ဖျက်ဆီးခဲ့၍ ကျပ်သိန်း ၅၀၀ခန့် ဆုံးရှုံးနစ်နာခဲ့ရကြောင်း မြို့နယ်(ပကဖ)က အသိပေးထားသည်။
စစ်ကောင်စီတပ်သည် စက်တင်ဘာ ၁၆ရက် နံနက်က စစ်ကြောင်းထိုးဝင်ရောက်ကာ ကား၊ ရိက္ခာနှင့် အဆောက်အဦများကို ဖျက်ဆီးသွားခြင်းဖြစ်သည်ဟု ဆိုသည်။
စစ်ကြောင်းဝင်လာသည်ကို ကင်းအဖွဲ့က ကြိုတင်မြင်လိုက်၍ ရဲဘော်များ ထိခိုက်မှုမရှိခဲ့ဟု ပြည်သူ့ကာကွယ်ရေးတပ်ဖွဲ့ တာဝန်ရှိသူတစ်ဦးက ပြောသည်။
“ဒါပေမဲ့ ရုတ်တရက် ချက်ချင်းဆိုတော့ ကားတွေနဲ့ ပစ္စည်းရိက္ခာတွေက ဘာမှ မသယ်လိုက်နိုင်ဘူး။ လူနဲ့ သင်တန်းသားတွေနဲ့ ရဲဘော်တွေနဲ့ လက်နက်တွေနဲ့ ဆုတ်လိုက်နိုင်တာပေါ့”ဟု ၎င်းက ပြောသည်။
Public Service Announcement
အဆိုပါ စစ်ကောင်စီတပ်သည် သင်တန်းစခန်းအား ဖျက်ဆီးပြီး ပြန်လည်ဆုတ်ခွာသွားပြီ ဟုဆိုသည်။
ထို့အပြင် ရေစကြိုနယ် ရေလယ်ကျွန်းက ပြန်လာသည့် စစ်ကြောင်းက ဆားလင်းကုန်းကျေးရွာသို့ ဝင်ရောက်စစ်ကြောင်းထိုးလျက်ရှိသည်ဟု ပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောသည်။
