မြင်းခြံထောင် ကိုပြောင်းရွှေ့ခံရတဲ့ နိုင်ကျဉ်းတွေ ရိုက်နှက် နှိပ်စက်မှုတွေကို ကြုံတွေ့နေရ

မုံရွာထောင်ကနေ မြင်းခြံထောင်ကို ပြောင်းရွှေ့ခံထားရတဲ့ နိုင်ငံရေးအကျဉ်းသားအချို့ ညှင်းပန်းနှိပ်စက်ခံရမှုတွေနေ့စဉ်ကြုံတွေ့နေရတယ်လို့ မုံရွာလူထုသပိတ်တိုက်ပွဲဦးဆောင်ကော်မတီက ဒီနေ့မှာ ထုတ်ပြန်အသိပေးပါတယ်။

ထောင်ပြောင်းခံလိုက်ရလိုက်တဲ့ နိုင်ကျဉ်းအချို့ဟာ ဆိုရင် သတိလစ်မေ့မြောတဲ့အထိ နှိပ်စက်ခံနေရတယ်လို့ဆိုထားပါတယ်။

မုံရွာထောင်ကနေ မြင်းခြံထောင်ကိုစတင်ပြောင်းရွှေ့တဲ့နေ့ကတည်းက ထောင်ဝါဒါတွေဟာ နိုင်ငံရေးအကျဉ်းသားတွေကိုတန်းစီရိုက်နှက်တာ ၊ နံရိုးနဲ့ မျက်နှာတွေကို ကန်ကျောက်တာ စတဲ့ ရုပ်ပိုင်ဆိုင်ရာညှင်းပန်းနှိပ်စက်မှုတွေအပြင် တော်လှန်ရေးကိုဆဲဆိုပုံဖျက်တဲ့ စိတ်ပိုင်းဆိုင်ရာ ညှင်းပန်းမှုတွေကို လုပ်ခဲ့တယ်လို့သိရပါတယ်။

ဒီလို ရိုက်နှက် ညှင်းပန်းမှုတွေကြောင့် မုံရွာ နည်းပညာတက္ကသိုလ်ကျောင်းသားများသမဂ္ဂရဲ့ ဥက္ကဋ္ဌဟောင်းဖြစ်သူ ကိုဇင်မင်းထက်ဟာ သတိလစ်မေ့မြောနေတယ်လို့လည်း မုံရွာလူထုသပိတ်တိုက်ပွဲဦးဆောင်ကော်မတီက အသိပေးထားပါတယ်။

Public Service Announcement

နိုင်ငံရေးအကျဉ်းသားတွေကို ပစ်မှတ်ထားကာညှင်းပန်းနှိပ်သူတွေထဲ မြင်းခြံထောင်ပိုင်လေးဖြစ်တဲ့ ဝင်းကြိုင်(သုံးပွင့်)၊ ထောင်မှူးတွေဖြစ်တဲ့ မြတ်ကျော်သူ (နှစ်ပွင့်)၊ မောင်မောင်သိန်း(နှစ်ပွင့်)တို့ပါဝင်တယ်လို့သိရပါတယ်။

ညှင်းပန်းနှိပ်စက်မှုကိုအမိန့်ပေးသူ ၊ ကိုယ်တိုင်ကိုယ်ကျ ပါဝင်သူ ထောင်အာဏာပိုင်တွေ ၊ထောင်ဝါဒါတွေ နဲ့ထောင်လက်ပါးစေတွေအားလုံးကိုအပြစ်ပေးအရေးယူနိုင်ဖို့အတွက် ဆက်လက်လုပ်ဆောင်သွားမယ်လို့လည်း မုံရွာလူထုသပိတ်တိုက်ပွဲဦးဆောင်ကော်မတီက ထုတ်ပြန်ထားပါတယ်။

ပြီးခဲ့တဲ့ ဧပြီလအတွင်း မုံရွာထောင်ကနေ နိုင်ကျဉ်း ၁၅၀ ကို မြင်းခြံထောင်နဲ့အိုးဘိုထောင်ဆီ ပြောင်းရွှေ့ခဲ့တာပါ။

ဒီလိုပြောင်းရွှေ့ခံရသူတွေထဲ မှာ မုံရွာသပိတ် ဦးဆောင်ကော်မတီမှာ ပါဝင်တဲ့ ဗကသ၊ တကသ ကျောင်းသားခေါင်းဆောင်တွေ၊ ကျောင်းသားတွေ အပါအဝင် နိုင်ငံရေး ပုဒ်မတွေနဲ့ ဖမ်းဆီး ပြစ်ဒဏ် ချခံထားရသူတွေအများစုပါဝင်ခဲ့တယ်လို့သိရပါတယ်။