စစ်အာဏာရှင်စနစ် ပူးပေါင်းတော်လှန်မည်ဟု ထားဝယ်ပြည်သူ့လွတ်မြောက် ရေးတပ်ဖွဲ့ (၁)နှစ်ပြည့် မွန်တပ် MSDFသဝဏ်လွှာပို့

ထားဝယ်ပြည်သူ့လွတ်မြောက်ရေးတပ်ဖွဲ့(TPLF)၏ (၁)နှစ်ပြည့်အထိမ်းမှတ်နေ့သို့ မွန်ပြည်ကာကွယ်ရေးတပ် – တောင်ပိုင်း(MSDF-S)က သဝဏ်လွှာပေးပို့ခဲ့ရာ စစ်အာဏာရှင်စနစ်အား လက်တွဲပူးပေါင်းတော်လှန်မည်ဟု ဖော်ပြခဲ့သည်။

အကြမ်းဖက်စစ်ကောင်စီမှ အာဏာသိမ်းပြီးနောက် ပြည်သူ့ခုခံစစ်နွေဦးတော်လှန်ရေးနှင့်အတူ ပေါ်ပေါက်လာသည့် ထားဝယ်ပြည်သူ့လွတ်မြောက်ရေးတပ်ဖွဲ့၏ ယနေ့(အောက်တိုဘာ ၆ရက်) တွင် ကျရောက်သည့် (၁)နှစ်ပြည့်အထိမ်းမှတ်နေ့တွင် တနင်္သာရီအမျိုးသားများပြည်နယ်အတွင်းရှိ လူငယ်များနှင့် ပြည်သူများ၏ စစ်အာဏာရှင်ဆန့်ကျင်ရေးတော်လှန်ရေးအောင်မြင်ပါစေကြောင်း ဆုမွန်ကောင်းတောင်းအပ်သည်ဟု သဝဏ်လွှာ၌ ပါရှိသည်။

မြန်မာနိုင်ငံသည် တိုင်းရင်းသားလူမျိုးများ၏ တန်းတူရေး၊ ကိုယ်ပိုင်ပြဌာန်းခွင့်နှင့် ဖက်ဒရယ်ပြည်ထောင်စုတည်ဆောက်ရေးကို ငြင်းဆိုခဲ့သည့် စစ်တပ်အုပ်ချုပ်ရေးနှင့် စစ်အာဏာအဆက် ဆက်ကြောင့် ဒီမိုကရေစီအခွင့်ရေးနှင့် လူအခွင့်ရေးသည်လည်း ဆိတ်သုဉ်းသွားပြီဖြစ်ကြောင်း၊ စစ်အာဏာရှင်စနစ်နှင့် ၂၀၀၈ ဖွဲ့စည်းပုံအခြေခံဥပဒေရှိနေသမျှကာလပတ်လုံး တိုင်းရင်းသားလူမျိုးများသည် စစ်ကျွန်စနစ်အောက်တွင် ဆက်လက်ဖိနှိပ်ခြင်း ခံနေရမည်ဖြစ်ကြောင်း MSDF-Sက ဆိုသည်။

ထို့ကြောင့် စစ်အာဏာရှင်စနစ်အား တော်လှန်တိုက်ပွဲဝင်ပြီး အမျိုးသားလွတ်မြောက်ရေးနှင့် မြန်မာပြည်သူများ၏ လွတ်မြောက်ရေးအတွက် တော်လှန်တိုက်ပွဲဝင်ခြင်းသည် မြင့်မြတ်သောလုပ်ရပ်ဖြစ်ကြောင်း၊ စစ်အာဏာရှင်စနစ်တိုက်ဖျက်ရေးတွင် မွန်ပြည်ကာကွယ်ရေးတပ် – တောင်ပိုင်းမှ ထားဝယ်ပြည်သူ့လွတ်မြောက်ရေးတပ်ဖွဲ့နှင့် လက်တွဲပြီး ပူးပေါင်းဆောင်ရွက်သွားမည်ဖြစ်ကြောင်း သဝဏ်လွှာ၌ ဖော်ပြခဲ့သည်။

Public Service Announcement

MSDF-S ရေးမြို့နယ်အတွင်းလှုပ်ရှားနေသည့် တော်လှန်ရေးတပ်ဖြစ်ကာ စစ်ကောင်စီတပ်နှင့် လက်ပါးစေများကို တိုက်ခိုက်လျက်ရှိသည်။