ဝက်လက်အရှေ့ခြမ်း လေကြောင်းတိုက်ခိုက်မှုအတွင်း ရဲဘော်တစ်ဦးနှင့် ပြည်သူနှစ်ဦး သတ်ဖြတ်ခံရ

စစ်ကိုင်းတိုင်း၊ ဝက်လက်မြို့နယ်အရှေ့ခြမ်း၌ စစ်ကောင်စီတပ်၏ လေကြောင်းတိုက်ခိုက်မှုအတွင်း Black Wolf PDFအဖွဲ့ ရဲဘော်တစ်ဦးနှင့် ဒေသခံပြည်သူနှစ်ဦးကို သတ်ဖြတ်သွားကြောင်း သတင်းရရှိသည်။

အောက်တိုဘာ ၈ ရက် မွန်းလွဲ ၁၂ နာရီ ၄၅ မိနစ်ခန့်က စစ်ကောင်စီတပ်သည် ဂျက်ဖိုက်တာ ၂ စီး၊ ရဟက်ယာဥ်လေးစီးဖြင့် ဝက်လက်မြို့နယ် ငါးပတ်ချောင်းကျေးရွာသို့ တိုက်ပွဲဖြစ်ပွားခြင်းမရှိဘဲ ဝင်ရောက်စီးနင်း ပစ်ခတ်တိုက်ခိုက်ခဲ့သည်။

ဝင်ရောက်စီးနင်းမှုတွင် ပိတ်မိခဲ့သော ရွာသူ၊ရွာသားများအား မဟာမိတ်များနှင့် ပူးပေါင်းကာ ကယ်ထုတ်ခဲ့ကြောင်း၊ ထိုသို့ကယ်ထုတ်နေစဥ်အတွင်း ညနေ ၆ နာရီ ၄၅ မိနစ်ခန့်တွင် စစ်ကောင်စီစစ်ကြောင်းနှင့်ထိပ်တိုက်တွေ့ခဲ့ရာ တိုက်ခိုက်၍မရသဖြင့် ပြန်လည်ဆုတ်ခွာခဲ့ကြောင်း Black Wolf PDF အဖွဲ့ ပြန်ကြားရေးတာဝန်ခံက ပြောသည်။

စစ်ကောင်စီဘက်က သာလွန်အင်အားဖြင့် ထိုးစစ်ဆင်လာမှု၊ လေကြောင်း အသုံးပြုမှုများကြောင့် အဖွဲ့သားများ ပြန်လည်ဆုတ်ခွာခဲ့ရာ ရဲဘော် ( BW SNIPER )နှင့် အဆက်သွယ်ပြတ်တောက်သွားခဲ့ရကြောင်း Black Wolf PDF အဖွဲ့ ပြန်ကြားရေးတာဝန်ခံက ပြောသည်။

Public Service Announcement

ရဲဘော် (BW SNIPER) အား BLACK WOLF – PDF အဖွဲ့သားများ ပြန်လည်စုစည်းပြီး တောနင်းရှာဖွေကြရာ အောက်တိုဘာ ၉ ရက် နံနက် ၇ နာရီတွင် ဓားဒဏ်ရာများဖြင့် သတ်ဖြတ်ခံထားရသည်ကို တွေ့ခဲ့ကြောင်း Black Wolf PDF အဖွဲ့ ပြန်ကြားရေးတာဝန်ခံက ပြောသည်။

ထို့အပြင် စစ်ကောင်စီတပ်က ကျဆုံးရဲဘော်နှင့်အတူ ဒေသခံပြည်သူနှစ်ဦးပါ သတ်ဖြတ်ခံခဲ့ရကြောင်း Black Wolf PDF အဖွဲ့ ပြန်ကြားရေးတာဝန်ခံက ပြောသည်။

” အဲ့ဒီနေ့က စခတွေက လေကြောင်းကနေ ပစ်လည်းပစ်။ အင်အားလည်းချပြီး မြေပြင်ကပါ တိုက်တာ။ ပိတ်မိနေတဲ့ အရပ်သားတွေကို ပြည်သူ့ရဲဘော်‌တွေက ကယ်ထုတ်ခဲ့ကြတယ်။ လက်နက်အင်အားမမျှတော့ ကျွန်တော်တို့ အထိအခိုက်ရှိခဲ့တယ်”ဟု ပြည်သူ့ကာကွယ်ရေးရဲဘော်တစ်ဦးက ပြောသည်။

SIG CROSS SNIPER တစ်လတ် ဆုံးရှုံးခဲ့ရကြောင်း Black Wolf Pdf က အသိပေးသည်။

ထို့အပြင် အဆိုပါနေ့က ရဲဘော် ၈ ဦးထက်မနည်းကျဆုံးခဲ့ပြီး လက်နက်များပါသိမ်းဆည်းခံခဲ့ရကြောင်း၊ Black Wolf Pdf အဖွဲ့အပါအဝင် အခြားအဖွဲ့များလည်း ရှိသေးကြောင်း ဒေသခံအချို့က ပြောသည်။