ကရင်အမျိုးသားအစည်းအရုံး(KNU) တပ်မဟာ(၆)နယ်မြေသို့ ထိုးစစ်ဆင်နေသည့် စစ်ကောင်စီတပ်များကို ကော်ဘရာစစ်ကြောင်းပါဝင်သည့် ပူးပေါင်းတပ်ဖွဲ့က တိုက်ခိုက်မှု ဆက်လက် လုပ်ဆောင်ခဲ့ရာ ဒရုန်းဖြင့် ဗုံးကြဲတိုက်ခိုက်ခဲ့ခြင်းကြောင့် စစ်ကောင်စီတပ်ဖွဲ့ဝင်နှစ်ဦး သေဆုံးခဲ့သည်ဟု ကော်ဘရာစစ်ကြောင်းက သတင်းထုတ်ပြန်သည်။
KNU တပ်မဟာ(၆)နယ်မြေ၊ လူခို့ ညောင်ချောင်းနေရာအား စစ်ကောင်စီတပ်က ကျူးကျော် အခြေပြုရန် ကြိုးစားလျက်ရှိရာ ယမန်နေ့ညသန်းခေါင်ယံတွင် စစ်ကောင်စီတပ်များက အတွဲလိုက်ဒုံးစနစ် MLRS ပစ်ခတ်တိုက်ခိုက်ခဲ့ကြောင်း၊ ပူးပေါင်းတပ်ဖွဲ့များက ဒရုန်းများဖြင့်ပြန်လည် ဗုံးကြဲတိုက်ခိုက်ခဲ့ရာ ခလရ(၂၀၇) မှ စစ်ကောင်စီတပ်သားနှစ်ဦး သေဆုံးခဲ့ခြင်းဖြစ်ကြောင်း စစ်မြေပြင်သတင်းကို ဖော်ပြသည်။
အဆိုပါ တိုက်ခိုက်မှုအား KNLA တပ်ရင်း (၂၇)ကော်ဘရာစစ်ကြောင်း ၊ Federal Wings Drone အဖွဲ့၊ တပ်မဟာစစ်ကြောင်း တပ်ခွဲ (၂)၏ ရောင်နီတပ်ခွဲဒရုန်းအဖွဲ့တို့ ပူးပေါင်းဆောင်ရွက်ခဲ့ခြင်းဖြစ်သည်ဟု အသိပေးထားသည်။
ယမန်နေ့ညပိုင်းတိုက်ပွဲ၌ ပူးပေါင်းတပ်ဖွဲ့များဘက်မှ တစ်စုံတစ်ရာထိခိုက်မှုမရှိခဲ့ကြောင်း ကော်ဘရာစစ်ကြောင်းက ထုတ်ပြန်သည်။
Public Service Announcement
ကော်ဘရာစစ်ကြောင်း ပါဝင်သည့် ပူးပေါင်းအဖွဲ့နှင့် စစ်ကောင်စီတပ်များသည် မြ၀တီ – ဝေါ်လေလမ်းအနီးတဝိုက်တွင် တိုက်ပွဲများ ဆက်တိုက်ဖြစ်ပွားလျက်ရှိပြီး စစ်ကောင်စီတပ်က အထိနာလျက်ရှိသည်။ ယမန်နေ့က ဖြစ်ပွားခဲ့သည်တိုက်ပွဲတွင် ကော်ဘရာစစ်သည်များ၏ စနိုက်ပါလက်ချက်ကြောင့် စစ်ကောင်စီတပ်က ဗျူဟာမှူးအဆင့်ရှိဗိုလ်မှူးကြီးတစ်ဦး သေဆုံးခဲ့သည်ဟု ကော်ဘရာစစ်ကြောင်းက ထုတ်ပြန်ထားသည်။
