ကချင်အနုပညာရှင်အချို့အပါအဝင်ထိခိုက်ကျဆုံးမှုများဟု ဒေသခံအချို့ပြော
ကေအိုင်အေ တပ်မဟာ ၉ တွင် KIO အထိမ်းအမှတ်နေ့ပွဲ အကြိုကျင်းပနေစဉ် စစ်ကောင်စီတပ်က လေကြောင်းမှ လာရောက်တိုက်ခိုက်ခဲ့သဖြင့်ကချင်တိုင်းရင်းသားအနုပညာရှင်အချို့အပါအဝင်ပြည်သူများထိခိုက်သေဆုံးမှုမျာကြောင်း KIA နှင့် နီးစပ်သူအချို့ကPeople’s Springသို့ပြောသည်။
အောက်တိုဘာ ၂၅ ရက်တွင်ကျရောက်မည့် ၆၂ နှစ်မြောက် ကချင်လွတ်လပ်ရေးအဖွဲ့ (KIO )၏နှစ်ပါတ်လည်နေ့ အထိမ်းအမှတ်အဖြစ် အကြိုပွဲကို KIA တပ်မဟာ ၉ အခြေစိုက်သည့် ဖားကန့်မြို့နယ် ကံစီးကျေးရွာအနီးတွင်ယမန်နေ့(အောက်တိုဘာ ၂၃ရက်)ညက ကျင်းပနေစဉ် စစ်ကောင်စီတပ်က ဂျက်တိုက်လေယာဉ်သုံးစင်းဖြင့် လာရောက်ဗုံးကြဲတိုက်ခိုက်ခဲ့ခြင်းဖြစ်သည်။ သေဆုံးသူများတွင် ဝါရင့်ကချင်တေးသံရှင်အော်ရာလီ ပါဝင်ခဲ့ပြီးသေဆုံးဒဏ်ရာရသူအရေအတွက်ကိုမူ People’s Spring ကအတည်မပြုနိုင်သေးပါ။
စစ်ကောင်စီတပ်က ဗုံးကြဲြဲက်ခိုက်မှုကြောင့် သေဆုံးသွားသည့် ပြည်သူ ၃၀ ကျော်ရှိပြီးထိုထဲတွင် ကချင်အနုပညာရှင်အသင်းမှ ကချင်တေးသံရှင်ကြီး အော်ရာလီပါဝင်ခဲ့ပြီး ကချင်အနုပညာရှင်အသင်း ဥက္ကဋ္ဌ(ဟောင်း) ရုပ်ရှင်နှင့် ဗီဒီယိုသရုပ်ဆောင် ဇော်ဒိန်လည်း ထိခိုက်ဒဏ်ရာရရှိထားသည်ဟု သိရကြောင်း ကချင်ပြည်နယ်အခြေစိုက်သတင်းဌာန Kachin News Group က ဖော်ပြထားသည်။
“တိုက်လေယာဉ်တွေက နမခကနေ လာတာလို့ သိရတယ်။ ဒါဟာ တမင်ကို ယုတ်ယုတ်ကမ်းကမ်း ပြုမူလိုက်တာပဲ။ သေဆုံးတဲ့အထဲမှာ ကချင်အနပညာရှင်အချို့ပါတယ်။ ကေအိုင်အေက အရာရှိအချို့ပါတယ်လို့ ကြားပေမယ့် ဒီဟာကို အသေးစိတ်မပြောလိုပါဘူး”ဟု ထိခိုက်သေဆုံးသူအချို့၏ မိတ်ဆွေတစ်ဦးက People’s Spring သို့ ပြောသည်။
Public Service Announcement
ကံစီးဒေသခံတစ်ဦးကလည်း “ပွဲကျင်းပနေတုန်း ဗုံးလာကြဲတာ။ ပွဲအပေါ်ကိုတည့်တည့်ကျတယ်လို့ သိရတယ်။ဝမ်းနည်းစရာကောင်းတယ်”ဟု ပြောသည်။
ကေအိုင်အေပြောရေးဆိုခွင့်ရှိသူ ဒုတိယဗိုလ်မှူးကြီး နော်ဘူအား ယနေ့ နံနက် အကြိမ်ကြိမ် ဆက်သွယ်မေးမြန်းရန် ကြိုးစားသော်လည်း အဆက်အသွယ် မရသေးပါ။
