စစ်ကိုင်းတိုင်း၊ မုံရွာ – ချောင်းဦးလမ်းပိုင်းတွင် Jummer ကားသုံးစီးဖြင့် မိုင်းရှာနေသော စစ်ကောင်စီတပ်အား ပဒေသာမိုင်းဖြင့် မိုင်းဆွဲတိုက်ခိုက်ရာ စစ်အုပ်စုအထိအခိုက်များကြောင်း AREA 71 Defense Force Monywa အဖွဲ့ခေါင်းဆောင် ကိုထွန်းက ပြောသည်။
ယနေ့ (နိုဝင်ဘာလ ၂ ရက်) နံနက် ၁၁ နာရီ ၃၉ မိနစ်ခန့်က မုံရွာမြို့မှ ထွက်ခွာလာသော စစ်ကောင်စီ၏ Jummer ကား သုံးစီးသည် မုံရွာ-ချောင်းဦးလမ်းပိုင်း တောင်ပုံကျေးရွာနှင့် ပုရစ်ကုန်းမြောက်ရွာကြား၌ ကား၏ဘေးဝဲယာတွင် မိုင်းရှာနေစဥ် မိုင်းဆွဲတိုက်ခိုက်ခဲ့ကြောင်း AREA 71 Defense Force Monywa အဖွဲ့ခေါင်းဆောင် ကိုထွန်းက ပြောသည်။
“မျက်မြင်ပြည်သူများ၏ ပြောပြချက်အရ စခ ၆ ကောင်မှာ လမ်းဘေးသို့လွင့်စင်သွားပြီး ခဏအကြာတွင် လူနာတင်ကားတစ်စီး ရောက်ရှိလာပြီး ဒဏ်ရာရသူစခများနှင့် ထိခိုက်သေဆုံးသည်ဟုထင်ရသည့် စခများအား တင်ဆောင်သွားကြောင်း သိရပါတယ်။”ဟု AREA 71 Defense Force Monywa အဖွဲ့ခေါင်းဆောင် ကိုထွန်းက ပြောသည်။
မိုင်းထိပြီးနောက် စစ်ကောင်စီတပ်က ရမ်းသမ်းပစ်ခတ်မှုများပြုလုပ်ခဲ့ကြောင်း၊ ထိခိုက်သေဆုံးသွားသည့် အလောင်းများအား ကားပေါ်တင် ဆောင်သွားပြီး အရေအတွက်များသည်ဟု ၎င်းက ဆိုသည်။
Public Service Announcement
အဆိုပါ စစ်ဆင်ရေးအား AREA 71 Defense Force Monywa၊ Farmers Revolution Force-CHU၊ Monywa Special ဒိတ်ဒိတ်ကြဲ၊ မဟာမိတ် သုံးဖွဲ့ပူးပေါင်း၍ တိုက်ခိုက်ခဲ့ခြင်းဖြစ်ပြီး ရဲဘော်များအထိအခိုက်မရှိဆုတ်ခွာနိုင်ကြောင်း အသိပေးထားသည်။
Jummer ကားသုံးစီးနှင့် စစ်ကောင်စီတပ်များအား အခြားအဖွဲ့များကလည်း မိုင်းဆွဲတိုက်ခိုက်ခဲ့ကြသေးသည်။
