စစ်ကိုင်းတိုင်း၊ မုံရွာမြို့နယ်တွင် စစ်ကောင်စီတပ်၏ မီးရှို့ဖျက်ဆီးခြင်းခံခဲ့ရသည့်ကျေးရွာ သုံးရွာမှ မီးဘေးသင့်ပြည်သူများ အကူအညီများလိုအပ်နေကြောင်း ဒေသတွင်းသတင်းရင်းမြစ်များက ပြောသည်။
စစ်ကောင်စီတပ်သည် ပြီးခဲ့သည့် နိုဝင်ဘာ ၃ရက်မှ နိုဝင်ဘာ ၉ရက်အထိ မုံရွာတောင်နယ်(မုံရွာ-အမြင့်လမ်းနယ်)ကို တစ်ပတ်တိတိ စစ်ကြောင်းထိုးကာ မီးရှို့ဖျက်ဆီးခြင်းများ ပြုလုပ်ခဲ့ကြောင်း၊ စစ်ကောင်စီတပ်၏ မီးရှို့ဖျက်ဆီးမှုကြောင့် နဂါးတွင်းကျေးရွာတွင် အိမ်ထောင်စု (၁၆)စု၊ ဂျိုးစုရွာတွင် အိမ်ထောင်စု သုံးစုနှင့် ထန်းလေးပင်ရွာတွင် အိမ်ထောင်စု(၁၁)စုတို့ မီးလောင် ဆုံးရှုံးခဲ့ကြောင်း မုံရွာ – အမြင့်လမ်းသတင်းမှန်ပြန်ကြားရေးအဖွဲ့က ပြောသည်။
“တချို့သော အိမ်ထောင်စုတွေက အိမ်ထောင်စုတစ်စုပဲဖြစ်ပေမယ့် နေအိမ်က၂အိမ်(သို့မဟုတ်) သုံးအိမ် မီးရှို့ခံခဲ့ရပါတယ်။”ဟု မုံရွာ-အမြင့်လမ်းသတင်းမှန်ပြန်ကြားရေးအဖွဲ့က ပြောသည်။
အဆိုပါ မီးရှို့ခံရသည့်နေအိမ်များအတွက် လှူဒါန်းသွားရန်စီစဥ်နေပြီး ပြည်သူများလည်း ပါဝင်လှူဒါန်းပေးကြရန် မုံရွာ-အမြင့်လမ်းသတင်းမှန်ပြန်ကြားရေးအဖွဲ့က မေတ္တာရပ်ခံထားသည်။
Public Service Announcement
စစ်ကောင်စီတပ်က အာဏာသိမ်းကာလစတင်ချိန်မှ သြဂုတ်၂၅ ရက်အထိ နေအိမ်ပေါင်း ၂၀၁၅၃ လုံးအား မီးရှို့ဖျက်ဆီးခဲ့သည်။
စစ်ကောင်စီတပ်က နိုဝင်ဘာ၇ ရက်တွင် မုံရွာမြို့နယ်၊ ထန်းလေးပင်ရွာအနီး၌ ဒေသကာကွယ်ရေးရဲဘော်နှင့်ပြည်သူ ၈ ဦးထက်မနည်းသတ်ဖြတ်သွားခဲ့သည်။
မီးရှို့ဖျက်ဆီး ခံခဲ့ရသော နေအိမ်များ၊ ဓာတ်ပုံ-CJ
