မင်းကင်းမြို့နယ်၊ ပျားသုံးကျေးရွာကိုမီးလာရှို့သော စစ်ကောင်စီတပ်နှင့် ပျူစောထီးများကို မင်းကင်းမြို့ပြည်သူ့ကာကွယ်ရေးတပ်ဖွဲ့နှင့် မဟာမိတ်များကနိုဝင်ဘာ ၂၇ ရက်တွင်ခုခံတိုက်ခိုက်ရာစစ်ကောင်စီတပ်ပြန်ဆုတ်သွားကြောင်းတိုက်ခိုက်ခဲ့သောPDF ခေါင်းဆောင်တစ်ဦးကပြောသည်။
” (စစ်ကောင်စီတပ်က) ပျားသုံးကျေးရွာနဲ့ မလှမ်းမကမ်းက ကျော်ရွာမှာတပ်စွဲပြီး ရွာကို လာလာ ဖျက်ဆီးတာ။ ဒီတစ်ခါနဲ့ဆို ၆ ကြိမ်ရှိပြီ။ အိမ်တွေကို မီးရှို့တယ်။ တိုက်အိမ်တွေဆို ပေါက်ဆိန်တွေနဲ့ ဖြိုတာ။ ဒီတစ်ခါတော့ ကျွန်တော်တို့ ခံပစ်လို့ ပြန်ဆုတ်သွားတယ်”ဟု People Defence Force Taung Dwin-Minkin TDPDFမှ တာဝန်ရှိသူတစ်ဦးကPeople’s Spring သို့ပြောသည်။
စစ်ကောင်စီနှင့်ပျူစောထီးအဖွဲ့အားတောင်တွင်း-မင်းကင်းPDF( TDPDF) နှင့် ရွှေတြိဂံပကဖ တို့ကနိုဝင်ဘာလ ၂၇ရက်နံနက်တွင် ခုခံတိုက်ခိုက်ခဲ့ကြခြင်းဖြစ်သည်။
မကြာခဏမီးရှို့ အကြမ်းဖက်ခံနေရသောပျားသုံးကျေးရွာဒေသခံများသည်စစ်ကောင်စီနှင့်ပျူစောထီးရန်ကို ကြောက်ရွံ့ကာ ရွာတွင်မနေရဲတော့ဘဲ တောတောင်များထဲတွင်တိမ်းရှောင်နေကြသည်။
Public Service Announcement
ယခုကာလတွင်အအေးပိုလာ၍စစ်ဘေးရှောင်များအတွက် စောင်နှင့် အနွေးထည်များလိုအပ်နေသည်ဟု PDFတစ်ဦးကပြောသည်။
နိုဝင်ဘာ ၂၇ရက်က တိုက်ပွဲတွင် TDPDFတပ်ဖွဲ့က စမ်းသပ်ထုတ်လုပ်ထားသောလက်နက်ကြီးဖြင့်လည်းပစ်ကူတိုက်ခိုက်ခဲ့ပြီး PDFများ အထိအခိုက်မရှိကြောင်းလည်းတာဝန်ရှိသူကပြောသည်။
စစ်ကောင်စီတပ်နှင့်ပျူစောထီးအဖွဲ့ ထိခိုက်မှုရှိနိုင်သော်လည်း ထိခိုက်သေဆုံးသောအရေအတွက်ကိုမူအတည်မပြုနိုင်ကြောင်းလည်း TDPDFကသတင်းထုတ်ပြန်သည်။
