လေကြောင်းမှ ဗုံးကြဲခဲ့သည့် လေသာရွာကို စစ်ကြောင်းထိုးနေပြီး မီးရှို့ခံရနိုင်ဖွယ်ရှိဟု ဒေသခံပြော၊ ထီးချိုင့် မြောက်ပြင်ဒေသရှိ ကျေးရွာများမှ ဒေသခံ သောင်းချီထွက်ပြေးတိမ်းရှောင်နေကြရ
လေကြောင်းမှ ဗုံးကြဲခဲ့သည့် လေသာရွာကို စစ်ကြောင်းထိုးနေပြီး မီးရှို့ခံရနိုင်ဖွယ်ရှိဟု ဒေသခံပြော၊ ထီးချိုင့် မြောက်ပြင်ဒေသရှိ ကျေးရွာများမှ ဒေသခံ သောင်းချီထွက်ပြေးတိမ်းရှောင်နေကြရစစ်ကိုင်းတိုင်း ထီးချိုင့်မြို့နယ်ရှိ အင်းတိန်ကျေးရွာကို စစ်ကောင်စီတပ်သည် ယမန်နေ့ညနေပိုင်းက စတင် မီးရှို့ဖျက်ဆီးခဲ့ပြီး ယနေ့နံနက်တွင်လည်း ထပ်မံမီးရှို့နေကြောင်း ဒေသခံကသတင်းပေးပို့သည်။
နိုဝင်ဘာ ၂၅ရက်တွင် ထီးချိုင့် ဆူးပုတ်ချောင်ရွာကို စစ်ကောင်စီတပ်က စတင်မီးရှို့ခဲ့ပြီး နိုဝင်ဘာ ၂၈ရက်တွင် အင်ကြင်းကုန်းရွာနှင့် အလယ်တောရွာကို မီးရှို့ခဲ့သည်။ ထို့နောက် ယမန်နေ့နံနက်က အင်းတိန်ရွာကို စစ်ကြောင်းထိုးဝင်ရောက်ပြီး မီးရှို့ခဲ့ခြင်းဖြစ်သည်။
“အင်းတိန်ရွာကို မနေ့က စရှို့တာ အခုမနက် ကျန်တဲ့ဟာတွေကို ထပ်ပြီးတော့မှ ရှို့နေပါပြီ။ သူတို့ စိတ်ကြိုက်ရွေးပြီးတော့မှ လိုက်ရှို့နေတာပါ။ အခု အဲဒီက လေသာဆိုတဲ့ ရွာကြီးနားကို ကပ်ခဲ့ပြီ။ ဟိုတစ်နေ့က ဗုံးကြဲသွားတဲ့ လေသာရွာကို သူတို့ ဆက်ရှို့မယ်လို့ ယူဆရပါတယ်။ လေသာရွာဘက်ကို သူတို့ စစ်ကြောင်းထိုးနေပြီလို့ ကြားပါတယ်။ကျွန်တော်တို့ ပြည်သူတွေကတော့ အားလုံး ငိုပြီး ရပ်ကြည့်နေရပါတယ်”ဟု ဒေသခံက ပြောသည်။
စစ်ကောင်စီတပ် စစ်ကြောင်းထိုးဝင်ရောက်လာပြီး ကျေးရွာများကို မီးရှို့နေ၍ ဒေသခံများ ထွက်ပြေးတိမ်းရှောင်နေကြရသည်ဟု ၎င်းက ဆိုသည်။
Public Service Announcement
“စစ်ဘေးရှောင်တွေကတော့ ကျေးရွာအသီးသီး အားလုံးပေါင်းဆို သောင်းချီနေပါပြီဗျ။ ထီးချိုင့်မြို့နယ် မြောက်ပြင် ဒေသ ခေါ်တာပေါ့။ မြောက်ပြင်ဒေသမှာက ရွာပေါင်း ၄၀ကျော်ရှိပါတယ်။အခု လေးရွာရှို့သွားတာ။ ရှို့တဲ့ ရွာတွေကအင်းတိန်ဆို ရွာကြီးပါဗျ။ အိမ်ခြေ ၅၀၀ ကျော်ရှိတယ်” ဟု ဒေသခံက ပြောသည်။
စစ်ကောင်စီတပ် စတင်ဝင်ရောက်ချိန်က ဒေသခံ ကာကွယ်ရေးတပ်အချို့က ခုခံတိုက်ခိုက်ခဲ့သော်လည်း လက်နက်အင်အား မမျှသည့်အပြင် စစ်ကောင်စီတပ်က လေကြောင်း ပစ်ကူဖြင့် နှစ်ရက်ဆက်တိုက်ခိုက်ခဲ့သည်။
ယနေ့ စစ်ကြောင်းထိုးနေသည့် လေသာရွာကို စစ်ကောင်စီတပ်က နိုဝင်ဘာ ၂၈ရက်တွင် ဗုံးကြဲတိုက်ခိုက်ခဲ့ရာ အရပ်သားအချို့ထိခိုက်မှုရှိခဲ့သည်။
စစ်ကောင်စီတပ် လက်ချက်ကြောင့် ဒေသခံများ ၏ နေအိမ်များ၊ စပါးကျီများ၊ အိမ်မွေးတိရိစ္ဆာန်များနှင့် လယ်ယာလုပ်ငန်းသုံး ကိရိယာများအပါအဝင် ပြည်သူလူထုပိုင် ပစ္စည်းများပျက်စီးဆုံးရှုံးခဲ့ရသည်။ စစ်ကောင်စီတပ်သည် ထီးချိုင့်အပါအဝင် စစ်ကိုင်းတိုင်းရှိ မြို့နယ်အများအပြားတွင် စစ်ကြောင်းထိုး ဝင်ရောက်ပြီး ကျေးရွာများကို မီးရှို့ဖျက်ဆီးမှုများ ဆက်တိုက်လုပ်ဆောင်နေသည်။
