ကောလင်းနယ် ကျောက်ပျဥ်သာတိုက်နယ်ရှိရွာများအား စစ်ကောင်စီ နှစ်ရက်ဆက်မီးရှို့နေ

စစ်ကိုင်းတိုင်း၊ ကောလင်းမြို့နယ်၊ ကျောက်ပျဥ် သာတိုက်နယ်အတွင်းရှိ ကျေးရွာများအား စစ်ကောင်စီတပ်က နှစ်ရက်ဆက် မီးရှို့ဖျက်ဆီးနေကြောင်း ဒေသခံများက ပြောသည်။

ယမန်နေ့(ဒီဇင်ဘာ ၁၀ ရက်)က စတင်စစ်ကြောင်းထိုးလာသော စစ်ကောင်စီတပ်သည် ကောလင်းမြို့နယ်၊ ဇီးဖြူကုန်း၊လျှော်ဖြူကုန်းနှင့် ပေပင်ချောင်ရွာများအား မီးရှို့ဖျက်ဆီးခဲ့သည်။

ယနေ့ (ဒီဇင်ဘာ ၁၁ ရက်)နံနက် ၈ နာရီခွဲခန့်တွင်လည်း ကျောက်ပျဥ်သာတိုက်နယ်၊ ပေပင်ချောင်ရွာကို ထပ်မံဝင်ရောက်မီးရှို့နေပြီး ကုက္ကိုကုန်းရွာကိုပါ ဝင်ရောက်ဖျက်ဆီး မီးရှို့နေကြောင်း Kawlin Revolution KR အဖွဲ့က ပြောသည်။

ယနေ့နံနက် ၆ နာရီခွဲဝန်းကျင်က ကျောက်ပျဥ်သာတိုက်နယ်အတွင်း ပစ်ခတ်သံများဆူညံနေကြောင်း ဒေသခံများက ​ပြောသည်။

Public Service Announcement

ကျောက်ပြင်သာတိုက်နယ်အတွင်း အိမ်ထောင်စုပေါင်း နှစ်ထောင်ကျော်၊ စစ်ရှောင်ဦးရေ ၁၀,၀၀၀ကျော် ရှိနေကြောင်း Kawlin Revolution KR အဖွဲ့က ပြောသည်။

“မနေ့ညကဇီးဖြူကုန်းနဲ့ လျှော်ဖြူကုန်းကို တစ်ညလုံး မီးရှို့သွားတယ်။”ဟု ဒေသခံတစ်ဦးက ပြောသည်။

စစ်ကောင်စီတပ်သည် ဒီဇင်ဘာ ၉ ရက် ညကလည်း ကောလင်းမြို့မရဲစခန်း မြောက်ဘက်၊ ဝါးရုန်းတုန်းအနီးတွင် လူငယ်ငါးဦးအား သေနတ်ဖြင့် ပစ်သတ်သွားပြီး အလောင်းများအားလမ်းဘေးတွင် စွန့်ပစ်သွားခဲ့သေးသည်။