စစ်ကောင်စီတပ်မှ လေးဦးသေပြီး တော်လှန်ရေး ရဲဘော်တစ်ဦးကျဆုံး
မကွေးတိုင်း၊ ရေစကြိုမြို့နယ် သဲတောကျေးရွာသို့ စစ်ကြောင်းထိုးဝင်ရောက်နေသော စစ်ကောင်စီတပ်အား မဟာမိတ်တပ်ဖွဲ့များနှင့်အတူ နှစ်ရက်ဆက်တိုက်ခိုက်ခဲ့ကြောင်း Southern YSO PDFက ပြောသည်။
ဒီဇင်ဘာ ၁၉ ရက်နံနက် ၉ နာရီခန့်က အင်အား ၁၀၀ကျော်ဖြင့် စစ်ကြောင်းထိုးလာသော စစ်ကောင်စီတပ်ကို မြိုင်နှင့် ပခုက္ကူမြို့နယ်များမှ တော်လှန်ရေးတပ်ဖွဲ့များနှင့် ပူးပေါင်းပြီး လက်နက်ကြီး၊ လက်နက်ငယ်များဖြင့် နှစ်ရက်ဆက်တိုက်ခိုက်ခဲ့ခြင်း ဖြစ်သည်။
အဆိုပါတိုက်ခိုက်မှုတွင် စစ်ကောင်စီတပ်က သဲတောရွာအား မီးရှို့ဖျက်ဆီး၊ ခိုးဆိုးလုယက်ကာ ရွှေလှေကားကျေးရွာဘက် တပ်ဆုတ်သွားစဥ် နယ်မြေခံတော်လှန်ရေး ရဲဘော်လေးဦးက နယ်မြေရှင်းလင်းရေးလုပ်ဆောင်ရန် သောတဲရွာသို့ဝင်ရောက်ခဲ့ရာ စစ်ကောင်စီတပ်ကင်းပုန်းနှင့်တိုးပြီး တိုက်ပွဲထပ်ဖြစ်ခဲ့ကြောင်း Southern YSO PDF မှ ဗိုလ်အောင်မောင်းက ပြောသည်။
နယ်မြေရှင်းလင်းရန်သွားရောက်သည့် တော်လှန်ရေးရဲဘော်လေးဦးအနက်မှ တစ်ဦးကျဆုံးပြီး သေနတ်တစ်လက်၊ကျည်ဘောက်ငါးခု အပါအဝင် ကျည် (၁၈၀)ခန့်နှင့် လက်ပစ်ဗုံးတစ်လုံးဆုံးရှုံးခဲ့ကြောင်း ဗိုလ်အောင်မောင်းက ရှင်းပြသည်။
Public Service Announcement
အလားတူ တော်လှန်ရေးရဲဘော်များ၏ ပစ်ခတ်တိုက်ခိုက်မှုကြောင့် စစ်ကောင်စီတပ်ဘက်မှ ဗိုလ်အဆင့်အရာရှိတစ်ဦးအပါအဝင် လေးဦးသေဆုံးပြီး ငါးဦးထက်မနည်း ထိခိုက်ဒဏ်ရာရသွားသည်ဟု Southern YSO PDFက ဆိုသည်။
ထို့ကြောင့် ဒီဇင်ဘာ ၁၉ ရက်နှင့် ၂၀ ရက် တိုက်ခိုက်ခံရ၍ အထိနာသွားသော စစ်ကောင်စီတပ်သည် အင်အားများထပ်မံဖြည့်တင်းခဲ့ပြီး သဲတောရွာနှင့် အခြားကျေးရွာနှစ်ရွာတွင် တပ်ဖြန့်ထားရာ ထိတွေ့တိုက်ပွဲများဆက်ဖြစ်လာနိုင်ကြောင်း YSO PDF က ခန့်မှန်းသည်။
“ဆုံးရူံးသွားတဲ့ လက်နက်တွေရယ် ကျဆုံးသွားတဲ့ ရဲ ဘော်တွေအတွက် တရားမျှတမှုလိုချင်တယ်။ သွေးကြွေးကို သွေးနဲ့ပဲ ဆပ်ရလိမ့်မယ်။ အာဏာရှင် စ…(စစ်ကောင်စီတပ်သား)တွေကို ကမ္ဘာမကြေဘူး”ဟု Southern YSO PDF မှ ဗိုလ်အောင်မောင်းက မှတ်ချက်ပေးသည်။
စစ်ကောင်စီတပ်သည် ရေစကြိုမြို့နယ် သဲတောကျေးရွာသို့ဝင်ရောက်စဥ် နေအိမ်များအား မီးရှို့ဖျက်ဆီးခဲ့သည့်အပြင် ဒေသခံပြည်သူသုံးဦးကိုပါ မီးရှို့အလောင်းဖျောက်ခဲ့ဟန်ရှိပြီး မီးလောင်းပြင်တွင် အရိုးစုများကျန်ရစ်ခဲ့ကြောင်း သိရသည်။
