▪︎စစ်ကောင်စီလက်နက်ကြီးဖြင့်ရမ်းပစ်၍ ဒေသခံ နှစ်ဦး အသက်ဆုံးရှုံး၊ ကလေးငယ်များအပါအဝင် ၇ဦးထက်မနည်းဒဏ်ရာရ
စစ်ကိုင်းတိုင်း ထီးချိုင့်မြို့နယ် အလယ်တောကျေးရွာတွင် စစ်ကောင်စီတပ် မိုင်းဆွဲတိုက်ခိုက်ခံရပြီး စစ်ကောင်စီတပ်ဖွဲ့ဝင်များ သေဆုံးထိခိုက်မှုများသကဲ့သို့ စစ်ကောင်စီတပ်က လက်နက်ကြီး ရမ်းသမ်းပစ်ခတ်၍ အရပ်သားသေဆုံးထိခိုက်မှုရှိခဲ့သည်ဟု ထီးချိုင့်ဒေသခံက ပြောသည်။
ဇန်နဝါရီ ၈ရက်တွင် အလယ်တောရွာသို့ ဝင်လာသည့် စစ်ကောင်စီတပ် မိုင်းဖြင့်တိုက်ခိုက်ခံခဲ့ရသည်ဟုသိရသည်။
“အဲဒီ စ…(စစ်ကောင်စီတပ်သား)တွေက ကျွန်တော်တို့ အလယ်တောရွာကို ဝင်တယ်။ ဝင်တဲ့အခါ ကျွန်တော်တို့ ကာကွယ်ရေးအဖွဲ့တွေက မိုင်းထောင်တာကို သူတို့ မိုင်းမိလိုက်တယ်။အလယ်တောဘုရား တောင်ရိုးပေါ်မှာလေ။ မိုင်းမိလိုက်တဲ့အခါ သူတို့ အသေအပျောက်တွေရှိတယ် အနာအစာတွေရှိတယ်။ သူတို့ အဲဒီမှာ တစ်ညအိပ်ပြီးတော့နောက်ရက်ကို အလယ်တောရွာကို အကုန်မီးရှို့သွားပြီး ပြန်အထွက်မှာ ကာကွယ်ရေးအဖွဲ့တွေနဲ့ ထိတွေ့မှု ဖြစ်တဲ့အခါသူတို့ ရမ်းသမ်းပြီး ပစ်တဲ့အတွက် ထန်းကုန်းကျေးရွာထဲကို လက်နက်ကြီးကျပြီး ကလေးတွေရော ထိပါတယ်။လူတစ်ယောက်ပွဲချင်းပြီးသေပါတယ်” ဟု ထီးချိုင့်ဒေသခံက ပြောသည်။
စစ်ကောင်စီတပ်ကပစ်ခတ်သောလက်နက်ကြီးကျည်ကြောင့်ထန်းကုန်းရွာမှဒေသခံနှစ်ဦးသေဆုံးခဲ့ပြီး၊ ကံပေါက်ကျေးရွာတွင်လည်း လက်နက်ကြီးထိ၍ ဒဏ်ရာရရှိသူ များရှိကြောင်းဒေသခံများကပြောသည်။
Public Service Announcement
ဇန်နဝါရီ ၉ရက်၌ ဖြစ်ပွားသည့် ထိတွေ့တိုက်ပွဲ၌လည်း စစ်ကောင်စီတပ်က သေဆုံးထိခိုက်မှုရှိနိုင်ကြောင်း ၎င်းကဆက်ပြောသည်။
“တိုက်ပွဲဖြစ်တဲ့အခြေအနေက သူတို့ဘက်က အကျအဆုံးရှိတယ်လို့တော့ ရပါတယ်။ သတင်းအတိအကျတော့ မရနိုင်ဘူးလေ။ မိုင်းထိတာကတော့ အနည်းဆုံး ၁၅ယောက်လောက်သေသွားတယ်လို့ သတင်းရတယ်။ အလောင်းတွေကိုအိမ်တွေထဲ ပစ်ထည့်ပြီးအိမ်တွေရောမီးရှို့သွားပါတယ်”ဟုအခြားထီးချိုင့်ဒေသခံကလည်းပြောသည်။
စစ်ကောင်စီတပ်၏ လက်နက်ကြီး ပစ်ခတ်မှုကြောင့် ဒဏ်ရာရသူ အနည်းဆုံး ၇ဦးရှိပြီး ကလေးငယ်သုံးဦး ပါဝင်သည်ဟု သိရကြောင်း ဒေသခံက ပြောသည်။
စစ်ကောင်စီတပ်သည် ၂၀၂၂ နှစ်ကုန်ပိုင်းကလည်း အလယ်တောကျေးရွာအပါအဝင် ထီးချိုင့်နယ်ရှိ ကျေးရွာပေါင်း ၂၀ကျော်ကို မီးရှို့ဖျက်ဆီးခဲ့သည်။ လက်ရှိတွင်လည်း စစ်ကောင်စီတပ် စစ်ကြောင်းများ ထီးချိုင့်နယ်မှ ကျေးရွာများကို မီးရှို့ဖျက်ဆီးမှုများ ဆက်လက်လုပ်ဆောင်နေဆဲဖြစ်ပြီး ဒေသခံကာကွယ်ရေးတပ်များနှင့်လည်း တိုက်ပွဲဖြစ်ပွားမှုများ ရှိနေသည်။
