ရွေးကောက်ပွဲ မဖြစ်ဖြစ်အောင် လုပ်မယ်လို့ စစ်ကောင်စီခေါင်းဆောင် ပြော

ဘယ်လိုအခြေအနေပဲဖြစ်စေ ရွေးကောက်ပွဲကျင်းပမယ်လို့ စစ်ကောင်စီ ခေါင်းဆောင်က အာဏာသိမ်းကာလ ၂ နှစ်ပြည့်ခါနီးမှာ ပြုလုပ်တဲ့ အစည်းအဝေးမှာ ထပ်ပြောလိုက်ပါတယ်။

ရွေးကောက်ပွဲကို တနိုင်ငံလုံးအတိုင်းအတာနဲ့ အကြားအလပ်မရှိ ကျင်းပမယ်လို့လည်း စစ်ကောင်စီခေါင်းဆောင်က မနေ့က ပြုလုပ်တဲ့အစည်းအဝေးမှာ ကြွေးကြော်ပါသေးတယ်။

ရွေးကောက်ပွဲကိုဝင်ပြိုင်မယ့် ပါတီတွေအတွက် နိုင်ငံရေးပါတီများမှတ်ပုံတင်တဲ့ဥပဒေကိုလည်း အသစ်ရေးဆွဲထုတ်ပြန်ဖို့ရှိပြီး အဲဒီဥပဒေ ထဲမှာ ဘယ်အချက်တွေထည့်သွင်းထားတယ်ဆိုတာကို စစ်ကောင်စီက ခေါင်းဆောင်က ထည့်မပြောပါဘူး။

ရွေးကောက်ပွဲမှာ မဲပေးတဲ့ သူတွေခြိမ်းခြောက်မှုမရှိဖို့၊ လွတ်လွတ်လပ်လပ်မဲပေးနိုင်ဖို့ကိုလည်း ဦးတည်ဆောင်ရွက်ရမယ်လို့ အစည်းအဝေးတက်လာတဲ့ စစ်ကောင်စီအဖွဲ့ဝင်တွေကို စစ်ကောင်စီခေါင်းဆောင်က မှာသွားပါသေးတယ်။

Public Service Announcement

အာဏာသိမ်းပြီးနောက် ရွေးကောက်ပွဲကို ၂၀၂၃ ခုနှစ် သြဂုတ်လထဲမှာ ကျင်းပမယ်လို့ စစ်ကောင်စီ ခေါင်းဆောင်က ပြောဆိုထားပါတယ်။ အဲဒီရွေးကောက်ပွဲအတွက် မြေပြင်မှာလည်း လူဦးရေ ကောက်ယူတာတွေ လုပ်နေပါတယ်။

NUG အစိုးရ ၊တိုင်းရင်းသားလက်နက်ကိုင် အင်အားကြီးအဖွဲ့အချို့ နဲ့ တော်လှန်ရေးအင်အားစုတွေက စစ်ကောင်စီရဲ့ ရွေးကောက်ပွဲကို လက်ခံပါဘူး။

စစ်ကောင်စီရွေးကောက်ပွဲဟာ စစ်အာဏာရှင်သက်ဆိုးရှည်မယ့်အတုအယောင် ရွေးကောက်ပွဲဖြစ်ပြီး ဘက်စုံအကျပ်အတည်းကြုံနေတဲ့ စစ်ကောင်စီအတွက် နိုင်ငံရေးအရ ထွက်ပေါက်သာ ဖြစ်တယ်လို့ တရားဝင်ထုတ်ပြောထားကြပါတယ်။

ဒါအပြင် စစ်ကောင်စီရဲ့ ရွေးကောက်ပွဲဟာ လွတ်လပ်တရားမျှတမှု မရှိမှာဖြစ်တဲ့အတွက် အသိအမှတ်မပြုဘူးလို့ အမေရိကန်အစိုးရကလည်း ပြီးခဲ့တဲ့ ရက်ပိုင်းကတင် ထပ်လောင်း ပြောဆိုထားပါတယ်။