ခရီးသည်သုံးဦးသေဆုံးပြီး ၃၀ဦးခန့် ထိခိုက်ဒဏ်ရာရ
ခရီးသည်သုံးဦးသေဆုံးပြီး ၃၀ဦးခန့် ထိခိုက်ဒဏ်ရာရရန်ကုန် – မန္တလေး အမြန်လမ်း(၁၆၇)မိုင်တွင် ယနေ့ (မတ်လ ၄) နံနက်အစောပိုင်းက ဒို့ညီနောင် ခရီးသည်တင်ယာဉ် တိမ်းမှောက်မှုဖြစ်ပွားပြီး သုံးဦးသေဆုံးကာ ၃၀ ဦးခန့် ထိခိုက်ဒဏ်ရာ ရရှိခဲ့ကြောင်း ဒေသခံလူမှုကူညီရေးအသင်းအဖွဲ့များမှတဆင့် သိရသည်။
အဆိုပါတိမ်းမှောက်မှု ဖြစ်ပွားသည့် ယာဉ်မှာ တောင်ကြီးမှ မြဝတီမြို့သို့ ထွက်ခွာလာသည့် ဒို့ညီနောင် ခရီးသည်တင်ယာဉ်ဖြစ်ပြီး ယနေ့ နံနက် ၄ နာရီခွဲကျော်တွင် မိုင်တိုင်(၁၆၇)အနီး၌ အရှိန်မထိန်းနိုင်ဘဲ တိမ်းမှောက်ခြင်း ဖြစ်ကြောင်း ဒေသခံပရဟိတအဖွဲ့က ဆိုသည်။
“လက်ရှိတော့ သေဆုံး ၃ ဦး၊ ဒဏ်ရာရ ၃၀ ဦး ရှိပါတယ်။ အားလုံးကို ဆွာဆေးရုံကို ပို့ထားတယ်။ ပြင်းထန်လူနာတွေကိုတော့ နေပြည်တော် ကုတင် ၁၀၀၀ ဆေးရုံကို ဆက်လက်ပို့ဆောင်နေပါတယ် “ဟု ဆွာမြို့နယ်လူမှုကူညီရေးအသင်းက ဆိုသည်။
ဒေသခံ လူမှုကူညီရေးအသင်းများ၏ ဖော်ပြချက်အရ ယင်းတိမ်းမှောက်မှု ဖြစ်စဉ်တွင် အမျိုးသား ၂၁ဦးနှင့် အမျိုးသမီး ၉ ဦး ထိခိုက်ဒဏ်ရာ ရရှိခဲ့ကြောင်း သိရသည်။
Public Service Announcement
