မြစ်ကြီးနား – ပူတာအိုလမ်း၌ စစ်ကောင်စီတပ်ကို KIA ကြားဖြတ်တိုက်ခိုက်၊ စစ်ကောင်စီတပ် ထိခိုက်မှုရှိဟု KIA ပြော

ကချင်ပြည်နယ် မြစ်ကြီးနား – ပူတာအိုလမ်းတွင် စစ်ကောင်စီတပ် ယာဉ်တန်းများကို ကချင်လွတ် လပ်ရေးတပ်မတော်(KIA)က မိုင်းဆွဲတိုက်ခိုက်ခြင်း၊ ခြုံခိုတိုက်ခိုက်ခြင်းများ လုပ်ဆောင်ခဲ့ရာ စစ်ကောင်စီတပ်က သေဆုံးထိခိုက်မှုရှိခဲ့သည်ဟု KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက ပြောသည်။

မတ်လ ၁၀ရက်မှစ၍ တစ်ပတ်တာအတွင်း အဆိုပါလမ်းပိုင်း၌ တိုက်ပွဲများဖြစ်ပွားခဲ့သည်ဟု ဆိုသည်။

“ဒီတစ်ပတ်အတောအတွင်းမှာ ကျွန်တော်တို့ ကချင်ပြည်နယ် မြစ်ကြီးနားနဲ့ ပူတာအိုလမ်းတကြောမှာ ခဏခဏ တိုက်ပွဲဖြစ်တာရှိပါတယ်။ မနေ့ကလည်း တိုက်ပွဲဖြစ်တာရှိပါတယ်”ဟု ဗိုလ်မှူးကြီးနော်ဘူက ပြောသည်။

စစ်ကောင်စီတပ် ယာဉ်တန်းများက စစ်ကြောင်းပုံစံဖြင့် ထိုးလာ၍ တိုက်ခိုက်ခဲ့ခြင်းဖြစ်သည်ဟု ဆိုသည်။

Public Service Announcement

“စစ်အင်အားကတော့ သိပ်ပြီးမများပါဘူး။ ဒါပေမဲ့ ကျွန်တော်တို့ သုံးသပ်တာက မြစ်ကြီးနားနဲ့ ဆွမ်ပရာဘွမ် ကားလမ်းတလျှောက်မှာ နယ်မြေစိုးမိုးရေး လုပ်နိုင်ဖို့တက်လာတဲ့ စစ်ကြောင်းတွေဖြစ်ပါတယ်။ တချို့တွေက ဆွမ်ပရာဘက်ကနေ ကြိုပြီး ဆင်းလာတဲ့ စစ်ကြောင်းတွေရှိပါတယ်။ အဲဒါ လှုပ်ရှားလာတဲ့ စစ်လှုပ်ရှားမှုတွေကို ကျွန်တော်တို့ဘက်က ခုခံတိုက်ပွဲတွေ ဆင်နွှဲလာတဲ့ တိုက်ပွဲတွေဖြစ်ပါတယ်”ဟု ဗိုလ်မှူးကြီးနော်ဘူက ပြောသည်။

ထို့အပြင် ၎င်းတို့ ခြုံခိုတိုက်ခိုက်၊မိုင်းဆွဲမှုများကြောင့် ရန်သူဘက်မှာ အနည်းနှင့်အများ ထိခိုက်မှုရှိသည်ဟု ဗိုလ်မှူးကြီးနော်ဘူက ဆက်ပြောသည်။

ကချင်ပြည်နယ် မံစီမြို့နယ်နှင့် ရှမ်ပြည်နယ်မြောက်ပိုင်း ကွတ်ခိုင် -သိန္နီကြားတွင်လည်း တိုက်ပွဲဖြစ်ပွားမှုရှိကြောင်း KIA တာဝန်ရှိသူက ပြောသည်။