ပူတာအို – မချမ်းဘောဒေသ ရွှေတူးဖော်သည့် ကုမ္ပဏီများက မှော်လုပ်သားများအား အခကြေးငွေအစား မူးယစ်ဆေးပေး အလုပ်ခိုင်းနေဟု KIA ဖော်ပြ

ကချင်ပြည်နယ် ပူတာအို – မချမ်းဘောဒေသရှိ ရွှေတူးဖော်နေသည့်ကုမ္ပဏီများက ၎င်းတို့ လုပ်သားများအား လုပ်အားခအစား မူးယစ်ဆေးပေးကာ အလုပ်စေခိုင်းနေကြောင်း ရွှေမှော်လုပ်သားများထံမှ သိရသည်ဟု ကချင်လွတ်လပ်ရေးအဖွဲ့(KIO/KIA) သတင်းနှင့်ပြန်ကြားရေးဌာန၏ ဗမာတိုင်းရင်းသားဘာသာ အစီအစဉ်၌ ဖော်ပြသည်။

ရွှေတူးဖော်သည့် ကုမ္ပဏီ ပိုင်ရှင်များက လုပ်သားများကို အောက်ပိုင်းဒေသများမှ လုပ်သားများခေါ်ယူပြီး အလုပ်ဝင်စတွင် မူးယစ်ဆေးဝါးအခကြေးငွေမယူဘဲ အလကားပေးဆောင် အလုပ်စေခိုင်းပြီး မူးယစ်ဆေးဆွဲပြီးနောက် ပိုက်ဆံမပေးဘဲ အလုပ်ဆက်လက် စေခိုင်းနေကြောင်း ဖော်ပြထားသည်။

အဆိုပါနေရာများ၌ အလုပ်လုပ်သူအများစုမှာ ဗမာ၊ ရှမ်း၊ ရခိုင်လူမျိုးများဖြစ်ပြီး ကချင်လူမျိုးများလည်း ပါဝင်ကာ အများစုမှာ လူငယ်များဖြစ်သည်ဟု ဆိုသည်။

ရွှေတူးဖော်သည့် ကုမ္ပဏီပိုင်ရှင်များက အလုပ်သမားများကို မတရားသဖြင့် အခကြေးငွေအစား မူးယစ်ဆေးဝါး ပေးဆောင်ကာ အလုပ်စေခိုင်းနေသော်လည်း သက်ဆိုင်ရာမှ တာဝန်ယူဖြေရှင်းပေးခြင်းမရှိကြောင်းနှင့် စစ်ကောင်စီတပ်မှ ရွှေမှော်အနီး ဘိန်းစိုက်ခင်းများ စိုက်ပျိုးလုပ်ကိုင်နေသည်ဟု KIA သတင်းပြန်ကြားရေးက ဆိုသည်။

Public Service Announcement

ပူတာအို – မချမ်းဘောဒေသ၌ ရွှေမှော် ၅၀ ကျော်ရှိပြီး ရွှေတူးဖော်သည့် ကုမ္ပဏီ အားလုံးနီးပါး ရွှေလုပ်သားများကို ငွေကြေးအစား ဘိန်းဖြူ၊ ဘိန်းမဲနှင့် ရာမ စသည့် မူးယစ်ဆေးဝါးများ ပေးဆောင်နေကြောင်း ဖော်ပြထားသည်။

ယင်းဖော်ပြချက်နှင့်ပတ်သက်၍ ဒေသခံအချို့ထံ မေးမြန်းရန် ဆက်သွယ်သော်လည်း အဆက်အသွယ်မရသေးပေ။