ကျောက်ထု-မင်းတပ်လမ်းတွင်စစ်တပ်တိုက်ခိုက်ခံရပြီး ၇ဦးသေဟုCDFကန်ပက်လက်​ပြော

ကျောက်ထုအမြောက်တပ်မှ ကျောက်ထုမြို့အတွင်း နယ်မြေရှင်းလင်းရေးထွက်လာသည့် စစ်ကောင်စီတပ်ကို ဒေသခံကာကွယ်ရေးပူးပေါင်းအဖွဲ့ ၃ဖွဲ့က ဆီးကြိုတိုက်ခိုက်ခဲ့ရာ စစ်သား ၇ဦးသေဆုံးခဲ့ကြောင်း ချင်းပြည်နယ်ကာကွယ်ရေးတပ်(CDF-ကန်ပက်လက်)မှတာဝန်ရှိသူက​ပြောသည်။

စစ်ကောင်စီတပ်သည် ကျောက်ထုအမြောက်တပ်မှ ဧပြီ ၂၃ ရက်​နေ့ကထွက်လာပြီး ကျောက်ထု-မင်းတပ်လမ်းတနေရာတွင် ဧပြီ ၂၃ ရက်​နေ့မှာပင်တိုက်ပွဲဖြစ်ပွားခဲ့ခြင်းဖြစ်သည်။

“ကျောက်ထုအမြောက်တပ်က စစ်ကောင်စီတပ်သားတွေကကျောက်ထုမြိုတစ်ဝိုက်ကို တစ်လတစ်ခါလောက်၊ တခါတလေ တစ်လ နှစ်ခါလောက်နယ်မြေရှင်းလင်းရေးလုပ်တတ်ကြတယ်။ဒီတစ်ကြိမ်လည်း သူတိုထွက်လာတာ ကျနော်တိုဘက်က သတင်းကြိုတင်ရထားခဲ့တယ်”ဟု CDF-ကန်ပက်လက်တာဝန်ရှိသူကပြောသည်။

သတင်းကြိုရခြင်းကြောင့် CDF(မင်းတပ်)၊ CDF(ကန်ပက်လက်)နှင့် The Youth Force (ဆောနှင့်ကျောက်ထု)အဖွဲ့တို့က ဆီးကြိုတိုက်ခိုက်ခဲ့ခြင်းဖြစ်သည်။

Public Service Announcement

တိုက်ပွဲသည်ဧပြီ ၂၃ ရက်ညနေ ၄နာရီမှ ၅နာရီအထိ တစ်နာရီကြာတိုက်ပွဲအတွင်း စစ်ကောင်စီတပ်သား ၇ဦးသေဆုံးပြီး CDF(မင်းတပ်) ရဲဘော်တစ်ဦး မစိုးရိမ်ရ ဒဏ်ရာရရှိခဲ့သည်။ စစ်ကောင်စီတပ်ထံမှာ ၆၀ မမ ဗုံးသီးတစ်လုံး၊ ၄၀ မမ ဗုံးသီးတစ်လုံးနှင့် MA ကျည်ဘောက်စ် ၂ခု သိမ်းဆည်းရမိသည်ဟုလည်းCDF-ကန်ပက်လက်ထုတ်ပြန်ထားသည်။

စစ်​ကောင်စီတပ်သားများ​သေဆုံးမှုကို People’s Spring ကသီးခြားအတည်မပြုနိုင်ပါ။

“နယ်မြေအခြေနေကတော့ ဆောမြိုနယ်ထဲဖြစ်တယ်။ကျောက်ထုအမြောက်တပ်နဲ့ ၈ မိုင်ကျော်ကျော်လေးပဲရှိတယ်။စစ်ရေးအခြေနေအရတော့ သူတိုဘက်က ထွက်လာတယ်။ ထွက်လာတိုင်းလည်း ပြည်သူတွေရဲ့ ပစ္စည်းတွေခိုးတယ် စစ်ဘေးရှောင်တွေ ဖမ်းချင်တိုင်းဖမ်းတာတွေရှိတယ်။” ဟု အထက်ပါတာဝန်ရှိသူကပြောသည်။

ပြည်သူများအ​ပေါ် အကြမ်းဖက်လုယက်မှုများကြောင့် စစ်ကောင်စီတပ်ကို ဆက်လက်တိုက်ခိုက်သွားမည်ဖြစ်ပြီး ပြည်သူများအနေဖြင့် သက်ဆိုင်ရာကာကွယ်​ရေးအဖွဲ့အစည်းများ၏ ထုတ်ပြန်ချက်များကိုလေးစားလိုက်နာ​ပေးရန်လည်း ၎င်းကတိုက်တွန်းသည်။