စစ်ကိုင်းတိုင်း၊ ကနီမြို့နယ်တွင် ရိက္ခာပြတ်၍ ထွက်ရှာသည့် စစ်ကောင်စီတပ်သားများနှင့်ပျူစောထီးများမိုင်းထိပြီး တစ်ဦးသေ၊ သုံးဦးဒဏ်ရာရရှိကြောင်း ကျောက်လုံးကြီး KLG PDF အဖွဲ့၏ ပြန်ကြားရေးတာဝန်ခံ AT က ပြောကြားသည်။
ယမန်နေ့ (ဧပြီ၂၇ ရက်) ညနေ ၆ နာရီခန့်ကကနီမြို့နယ်၊ အလယ်ကျွန်း ပျူစောထီးကျေးရွာမှ သရက်တောကျေးရွာဘက်သို့ အင်အား ၁၀ဦးခန့်ဖြင့် စစ်ကြောင်းထိုးလာသော စစ်သားနှင့်ပျူများအား သရက်တောကျေးရွာသို့ မရောက်မီ KLG PDF ကျောက်လုံးကြီးအဖွဲ့ ထောင်ထားသော တိုက်မိုင်း တစ်လုံးထိခဲ့သည်။
အဆိုပါ မိုင်းကွဲမှုကြောင့် အလယ်ကျွန်းရွာမှ ပျူတစ်ဦးသေဆုံးပြီး သုံးဦးထိခိုက်ဒဏ်ရာရရှိကြောင်း AT က ပြောသည်။
“အလယ်ကျွန်းပျူရွာမှာ စစ်သားနဲ့ ပျူရယ်၊ ရဲစုစုပေါင်း ၁၀၀ဝန်းကျင်ရှိတယ်။ ရိက္ခာမရှိတော့လို့ သရက်တောရွာဘက် ထွက်လာတဲ့အချိန် မိုင်းဆွဲတိုက်ခိုက်ခဲ့တာ။ ပြည်သူတွေရဲ့ ပစ္စည်းတွေကို ယူဖို့ထွက်လာရင်း အခုလို မိုင်းမိပြီးသေတာ”ဟု အထက်ပါတာဝန်ခံက ဆိုသည်။
Public Service Announcement
စစ်အုပ်စုသည် မိုင်းထိသူများအား သယ်ဆောင်ကာ အလယ်ကျွန်းရွာသို့ နောက်ကြောင်းပြန်ဆုတ်သွားကြောင်း ရဲဘော်အချို့က ပြောသည်။
စစ်ကိုင်းတိုင်းအတွင်းရှိ စစ်ကောင်စီတပ်ထောက်ခံသော ပျူရွာများအား ဒေသတွင်းကာကွယ် ရေးအဖွဲ့များက ဝိုင်းဝန်းပိတ်ဆို့တိုက်ခိုက်လေ့ရှိပြီး စစ်ကောင်စီတပ်က ကာကွယ်မပေးနိုင်၍ ပျူရွာများရိက္ခာအတွက် ခက်ခဲနေသည်ဟု သတင်းရရှိသည်။
