▪︎မြန်မာပြည်သူများအပေါ် နိုင်ငံတကာအသိုင်းအဝန်း တာ၀န်ပျက်ကွက်နေဟု ဝေဖန်
ဂျပန်အစိုးရသည် ယူကရိန်းကျူးကျော်စစ်နှင့်ပတ်သက်၍ ရုရှားကို ဒဏ်ခတ်အရေးယူသကဲ့သို့ မြန်မာစစ်ကောင်စီကို ပိတ်ဆို့အရေးယူသင့်ကြောင်း ကုလသမဂ္ဂအထူးအစီရင်ခံစာတင်သွင်းသူ Tom Andrews က တိုက်တွန်းသည်။
မြန်မာစစ်ကောင်စီ၏ ရက်စက်ကြမ်းကြုတ်မှုနှင့် ဖိနှိပ်မှုများကိုလည်း အဆိုပါ ကုလသမဂ္ဂလူ့အခွင့်အရေးကောင်စီ၏ မြန်မာနိုင်ငံဆိုင်ရာအထူးအစီရင်ခံစာတင်သွင်းသူက ပြင်းထန်စွာဝေဖန်သည်။
မြန်မာစစ်ကောင်စီတပ်သားများကို လေ့ကျင့်ပေးရေးအစီအစဥ်ကို ချက်ချင်းရပ်တန့်ရန် ၎င်းက တိုက်တွန်းခဲ့ပြီး ယင်းလုပ်ဆောင်မှုသည် ဂျပန်စစ်တပ်၏ပုံရိပ်ကို ထိခိုက်စေသည်ဟုသတိပေးသည်။
“မြန်မာနိုင်ငံရဲ့ လူ့အခွင့်အရေးအခြေအနေက ကြောက်မက်ဖွယ်ဖြစ်ပြီး ပိုမိုဆိုးရွားလာပါတယ်” ဟု Tom Andrews က ဂျပန်ခရီးစဥ်နောက်ဆုံးရက်တွင် သတင်းထောက်များကို ပြောသည်။ ၎င်း၏ တိုကျိုခရီးစဥ်အတွင်း ဂျပန်အစိုးရတာ၀န်ရှိသူများနှင့် စီးပွားရေးလုပ်ငန်းရှင်များနှင့် တွေ့ဆုံခဲ့သည်။
Public Service Announcement
“ဂျပန်အနေနဲ့ အခြားသော G7 နိုင်ငံတွေနဲ့အတူ မြန်မာစစ်တပ်နဲ့ ၎င်းရဲ့ အရေးပါတဲ့ ဝင်ငွေရလမ်းရင်းမြစ်တွေကို ပစ်မှတ်ထားဒဏ်ခတ်ပိတ်ဆို့ရေးမှာ ပူးပေါင်းပါဝင်ဖို့ ကျွန်တော်တိုက်တွန်းပါတယ်။ ယူကရိန်းအရေးမှာ ဂျပန်တုန့်ပြန်ဆောင်ရွက်ခဲ့သလို လုပ်ဆောင်ရုံပါပဲ”ဟု၎င်းကပြောသည်။
စစ်ကောင်စီကို ဒဏ်ခတ်ပိတ်ဆို့မှုများသည် မြန်မာပြည်သူများကို တိုက်ခိုက်ရန် စစ်တပ်၏စွမ်းရည်ကို အားနည်းစေမည်ဟု Tom က ဖြည့်စွက်ပြောသည်။
ဂျပန်သည် စစ်အာဏာသိမ်းပြီးနောက်ပိုင်း မြန်မာနိုင်ငံသို့အကူအညီပေးရေးများစီမံကိန်းကို ရပ်တန့်ခဲ့သော်လည်း ရှိနေပြီးသောပရောဂျက်များကို ဆက်လက်လုပ်ဆောင်နေဆဲဖြစ်သည်။
နိုင်ငံတကာအသိုင်းအဝန်းသည် မြန်မာပြည်သူများအပေါ် တာဝန်ယူမှုပျက်ကွက်နေဆဲဖြစ်ကြောင်း Tom Andrews က ပြောသည်။
(ကုလသမဂ္ဂအထူးအစီရင်ခံစာတင်သွင်းသူ Tom Andrews ကိုဂျပန်နိုင်ငံ ၊တိုကျိုမြို့ရှိ FCCJ တွင် သောကြာနေ့က သတင်းစာရှင်းလင်းပွဲပြုလုပ်နေစဥ်။ ကိုးကား/ဓါတ်ပုံ – AFP )
