စပါးကျီ ၁၅၀ကျော်ပျက်စီးခဲ့၍ စားနပ်ရိက္ခာလိုအပ်ချက်ရှိဟု အသိပေး
စပါးကျီ ၁၅၀ကျော်ပျက်စီးခဲ့၍ စားနပ်ရိက္ခာလိုအပ်ချက်ရှိဟု အသိပေးမိုခါဆိုင်ကလုန်းမုန်တိုင်းကြောင့် ချင်းပြည်နယ် မင်းတပ်မြို့နယ်အတွင်းရှိ ကျေးရွာပေါင်း ၂၄ရွာမှ နေအိမ်အဆောက်အဦးများ ထိခိုက်ပျက်စီးခဲ့ကြောင်း မင်းတပ်မြို့နယ် ပြည်သူ့အုပ်ချုပ်ရေးအဖွဲ့က ယနေ့ ထုတ်ပြန်သည်။
ယနေ့ (မေလ ၁၉ ရက်)အထိ စာရင်းများအရ နေအိမ် ၆၀၀ နီးပါး၊ အစိုးရအဆောက်အဦးရ၉၄ ခု၊ ဘာသာရေးအဆောက်အဦ ၂၃ ခု၊ စပါးကျီပေါင်း ၁၅၃ခု ထိခိုက်ပျက်စီးပြီး အခြား အိမ်မွေးကျွဲနွားတိရစ္ဆာန် ၁၃ကောင် သေဆုံးခဲ့ကြောင်း အသိပေးသည်။
“တိုက်နယ်တွေကျေးရွာတွေ အသီးသီးကနေ ပျက်စီးဆုံးရှုံးစာရင်းလာပို့ပေးတယ်။ အဓိကတော့ ပြည်သူ့အုပ်ချုပ်ရေးနဲ့ဆိုင်တဲ့အပိုင်းတွေပေါ့နော်။ ပြည်သူ့အုပ်ချုပ်ရေးရုံးကိုလာပို့တယ်။ အဲဒီကနေ စာရင်းတွေယူပြီးမှ ပြည်သူ့အုပ်ချုပ်ရေးကနေ ပေါ့နော်လိုအပ်တာတွေ ပြန်လည် ပြုပြင် မွမ်းမံတာတွေ တည်ဆောက်တာတွေ ကျနော်တို့ လုပ်အားနဲ့လုပ်ပေးနိုင်တဲ့ အပိုင်းတွေ စတင်လုပ်ဆောင်နေပါပြီ။ လွန်ခဲ့တဲ့ သုံးလေးရက်လောက်ကတည်းကပေါ့။”ဟု မင်းတပ် ချင်းကာကွယ်ရေးတပ်(CDF) ပြောရေးဆိုခွင့်ရှိသူ ဆလိုင်းဟာအွမ်က ပြောသည်။
လိုအပ်သည့်လူသားချင်းစာနာထောက်ထားမှု အကူအညီများရနိုင်ရေး ဆောင်ရွက်နေကြောင်း ၎င်းက ဆိုသည်။
Public Service Announcement
“ကျနော်တို့ရဲ့ ဆုံးရှုံးမှုက ကြီးပေမယ့်လို့ ရခိုင်ပြည်နယ်နဲ့ စာရင် ကျနော်တို့ဘက်က တအားကြီးပြောဖို့ မဝံ့မရဲဖြစ်တာပေါ့ဗျာ။ ကျနော်တို့တင်မဟုတ်ပါဘူး မုန်တိုင်းဘေးအားလုံးကို ကူညီပါဝင်ပေးဖို့ မေတ္တာရပ်ခံချင်တာပေါ့”ဟု ဆလိုင်းဟာအွမ်က ပြောသည်။
အရေးပေါ် လိုအပ်ချက်အဖြစ် ဆန်နှင့်စားနပ်ရိက္ခာ လိုအပ်လျက်ရှိပြီး ကားလမ်း၊ မြေသားလမ်းများ ပြိုကျပျက်စီးမှုကြောင့် အခြားလိုအပ်သော ဆေးဝါးနှင့် ကုန်စည်များသယ်ယူရန်ခက်ခဲနေကြောင်း မင်းတပ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။
တောင်ယာခင်းများနှင့် စပါးကျီများလည်း ပျက်စီးဆုံးရှုံးမှုများသောကြောင့် လာမည့်မုတ်သုန်မိုးရာသီတွင် တောင်သူများအတွက် အလွန်ခက် ခဲလာမည်ဟု ဖော်ပြသည်။
ပျက်စီးဆုံးရှုံးမှုစာရင်းများကို မြေပြင်ကွင်းဆင်း၍ ဆက်လက်ကောက်ယူနေဆဲဖြစ်ပြီး ထပ်မံရရှိလာသောစာရင်းများကို ပြန်လည်တင်ပြသွားမည်ဟု ထုတ်ပြန်သည်။
