ကချင်ပြည်နယ် ဖားကန့်မြို့နယ်တွင် ယမန်နေ့ (မေလ ၂၄ရက်) နံနက်က မိုးသက်လေပြင်းကျ၍ မိုးကြိုး ပစ်ခဲ့ရာ လူနှစ်ဦးသေဆုံးပြီး နေအိမ်အချို့ ပျက်စီးခဲ့သည်။
နံနက် ၈နာရီခန့်မှစတင်ကာ မိုးသက်လေပြင်းကျရောက်ခဲ့ခြင်းဖြစ်သည်။ ဖားကန့်မြို့နယ် မမုံကျေးရွာမှ ရေမဆေးကျောက်ရှာဖွေသူ အမျိုးသားတစ်ဦး၊ ကထန်ကျေးရွာမှ ကျောက်စိမ်းတူးဖော်ရေး ကုမ္ပဏီဝန်ထမ်း အမျိုးသားတစ်ဦးတို့ မိုးကြိုးထိမှန် သေဆုံးခဲ့သည်ဟု ဒေသခံများကပြောသည်။
“ရာသီဥတုက ရုတ်တရက်ဆိုးဝါးသွားတာဗျ။ မိုးကြိုးပစ်လို့ နှစ်ယောက်တောင် သေတယ်။ နေရာမတူကြဘူး။ နည်းနည်းတော့ ကြောက်စရာကောင်းတယ်”ဟု ဖားကန့်ဒေသခံတဦးက ပြောသည်။
သေဆုံးသူနှစ်ဦးမှာ အသက် (၄၀)ခန့် ကိုစိုင်းမောင်မြင့်နှင့် ကိုရွှေသိန်းဆိုသူ ဖြစ်သည်။
Public Service Announcement
လေပြင်းတိုက်ခတ်မှုကြောင့် ဖားကန့်မြို့ ဂေါက်ကွင်းဖက်မှ နေအိမ်အချို့ အမိုးလန်ပျက်စီးခဲ့ပြီး သစ်ပင်ကြီးအချို့လည်း လဲကျခဲ့ကြောင်း သတင်းရရှိသည်။ သို့သော် ပျက်စီးဆုံးရှုံးမှုကို လတ်တလော မသိရသေးပေ။
ယခုကာလသည် မိုးကြိုးနှင့် လေပြင်းဘေးကို သတ်ိထားရမည့်ကာလ ဖြစ်သည်။ ပုံမှန်ရာသီဥတုအခြေအနေမဟုတ်ဘဲ ရုတ်တရုတ် မိုးရွာလာပါက ခိုင်ခန့်သော အမိုးအကာများအောက်တွင်သာ နေထိုင်ရန်၊ ကွင်းပြင်နေရာများနှင့် သစ်ပင်ကြီးများအောက်တွင် မနေရန် မိုးကြိုးနှင့်လေပြင်းဘေး သတိပေးချက်များတွင် ဖော်ပြထားသည်။
ဖားကန့်ဒေသသည် မိုးကောင်းပါက မြေစာပုံများပြိုကျသည့်အန္တရာယ်လည်း ရှိနေသည်။
