စစ်ကိုင်းတိုင်း ပင်လယ်ဘူးမြို့နယ်၊ ကြောင်လည် ကျေးရွာတွင် ယမန်နေ့(ဇွန်လ ၆ရက်) နေ့လယ်က တိုက်ပွဲအတွင်း စစ်ကောင်စီဘက်မှ ၃၀ဦးထက်မနည်းသေဆုံးပြီး ဂျက်ဖိုက်တာဖြင့် လေးကြိမ်လာရောက်တိုက်ခိုက်သွားကြောင်း ပြည်သူ့ကာကွယ်ရေးတပ်ဖွဲ့များက ပြောသည်။
ကြောင်လည်ရွာတွင် ဇွန်လ ၆ရက် နေ့လယ် ၁နာရီခန့်မှစတင်၍ ၂နာရီနီးပါးကြာ တိုက်ပွဲအပြင်းအထန် ဖြစ်ပွားခဲ့သည်ဟု ကောလင်းမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးကပြောသည်။
“တိုက်ပွဲမှာ စစ်တပ်ဘက်က ၃၀ထက်မနည်း သေ တယ်။ သူတို့ လူတွေပိတ်မိနေလို့ ဂျက်ဖိုက်တာနဲ့ လေးကြိမ်ပစ်တယ်။ ကာကွယ်ရေးတပ်ဖွဲ့ဝင်တွေဘက်က ကြီးမားတဲ့အထိအခိုက်မရှိခဲ့ပါဘူး”ဟု ၎င်းက ပြောသည်။
ပင်လည်ဘူးမြို့နယ်အတွင်း စစ်ကောင်စီအင်အား ၁၀၀ခန့်က စစ်ကောင်းထိုးဝင်ရောက်လာသည်ကို ပင်လည်ဘူးနှင့်ကောလင်းမြို့နယ်အပြင် ဒေသတွင်း ပြည်သူ့ကာကွယ်ရေးတပ်ဖွဲ့များက တိုက်ခိုက်ခဲ့ခြင်းဟု သတင်းရရှိသည်။
Public Service Announcement
“တပ်ရင်းကျပြီးသား အဖွဲ့တွေရော၊ လိုကယ်အဖွဲ့တွေပါ ပေါင်းတိုက်တာ။ မိုင်းလည်းဆွဲ၊ ရင်ဆိုင်လည်း ပစ်ပေါ့ဗျာ။ ပွဲကတော့ တော်တော်လေး ကောင်းခဲ့ပါတယ်”ဟု ပြည်သူ့ကာကွယ်ရေးရဲဘော်တစ်ဦးကပြောသည်။
အဆိုပါ စစ်ကြောင်းသည် ပင်လည်ဘူးမှ ကန့်ဘလူမြို့နယ်ဘက်သို့ ထွက်ခွာလာ၍ ဒေသခံများ ယာယီတိမ်းရှောင်နေကြရကြောင်း သတင်းရရှိသည်။
ကန့်ဘလူမြို့တွင်လည်း စစ်ကောင်စီစစ်ကောင်းကို ကာကွယ်ရေးတပ်ဖွဲ့များက တိုက်ခိုက်နေပြီး ချပ်သင်းနှင့် ချပ်ကြီးရွာကြားတွင် မေလ ၆ရက် ညနေက စစ်ကောင်စီယဉ်တန်းကို မိုင်းဆွဲတိုက်ခိုက်ခဲ့သည်။
“ချပ်သင်းနှင့် ချက်ကြီးကြားက ဖလားရရွာမှာ မိုင်းအတွဲလိုက်ဆွဲတာ။ ဘယ်လောက်သေသွားလဲတော့ သတင်းအတိအကျမရသေးပါဘူး။ တစ်စီးကတော့ လမ်းဘေး ထိုးကျသွားတာ”ဟု ကာကွယ်ရေးရဲဘော်တစ်ဦးက ပြောသည်။
ကန့်ဘလူမြို့နယ် ချပ်သင်းကျေးရွာတွင် အထိုင်ချထားသည့် စစ်ကောင်စီစခန်းကင်းစခန်း လေးခုကို ဇွန်လ ၂ရက်တွင် ပြည်သူ့ကာကွယ်ရေးတပ်ပေါင်းစုက တိုက်ခိုက်ခဲ့သေးသည်။
အဆိုပါတိုက်ပွဲတွင် စခန်းသုံးခုကို သိမ်းယူနိုင်ခဲ့သော်လည်း စစ်ကောင်သီလေကြောင်းကြောင့် ပြန်လည်ဆုတ်ခွာခဲ့ရသည်။ ယင်းနေ့ တိုက်ပွဲတွင် ကာကွယ်ရေးရဲဘော်နှစ်ဦး ကျဆုံးခဲ့သည်။
ပင်လယ်ဘူး၊ ကန့်ဘလူတို့နှင့် ထိစပ်နေသော ကောလင်းမြို့နယ်တွင်လည်း တိုက်ပွဲများဖြစ်နေသည်။ ကောလင်းမြို့နယ် ဥမင်ကုန်းရွာတွင် ဇွန်လ ၄ရက် ညနေက တိုက်ပွဲဖြစ်ခဲ့ရာ စစ်ကောင်စီတပ်အထိနာခဲ့ပြီး ဖျက်ဖိုက်တာဖြင့် လာရောက် ပစ်ခတ်သွားသည်ဟု ဒေသခံများက ပြောသည်။
“ဥမင်တောနဲ့ တောင်ပလူရွာကြားမှာ တိုက်ပွဲဖြစ်တာ။ စစ်တပ်ဘင်က ၁၅ယောက်ထက်မနည်းဘူး သေပါတယ်။ ဂျက်ဖိုက်တာက တံတားဦးက တက်လာပြီး ချောင်းကွေ့ရွာကို မှားပစ်သွားတာ။ လူမထိပါဘူး။ အိမ်နှစ်လုံးနဲ့ အိမ်မွေးတိရိစ္ဆာန်တချို့တော့ ထိတယ်”ဟု ကောလင်းမြို့နယ်ပြည်သူ့ကာကွယ်ရေးတပ်ဖွဲ့ ထောက်ပို့ရဲဘော်တစ်ဦးကပြောသည်။
ယခုရက်ပိုင်းတွင် ကောလင်း၊ကန့်ဘလူ၊ ပင်လည်ဘူး ဒေသများမှ တိုက်ပွဲများအတွင်း စစ်ကောင်စီဘက်မှ ၄၅ဦးထက်မနည်းသေဆုံးခဲ့ပြီး ကာကွယ်ရေရဲဘော်နှစ်ဦး ကျဆုံးခဲ့သည်။
ယမန်နေ့က ကြောင်လည်ကျေးရွာတိုက်ပွဲတွင် စစ်ကောင်စီထံမှ လက်နက်ခဲယမ်းအချို့ပါ သိမ်းယူနိုင်ခဲ့ကြောင်း သတင်းရရှိသည်။
