နယ်မြေကွင်းဆင်းရင်း ဖမ်းဆီးခံလိုက်ရသည့် ရဲ ဘော်နှစ်ဦးကို လမ်းပြခိုင်း၍ ရိုးမထဲစစ်ကြောင်းထိုးလာသော စစ်ကောင်စီတပ်ကို လမ်းမှစောင့်ကြိုမိုင်းဆွဲတိုက်ခိုက်ကာ ရဲဘော်နှစ်ဦးအား ကယ်ထုတ်ခဲ့ကြောင်း သာယာဝတီခရိုင် PDF တပ်ရင်း ၃၈၀၁၊ တပ်ခွဲ ၅ မှ တာဝန်ရှိသူတစ်ဦးက People’s Spring သတင်းဌာနသို့ ပြောသည်။
ဇွန် ၁၁ ရက်နေ့ နေ့လယ် ၃ နာရီ ၄၀ ခန့်က အင်အား ၂၀ ခန့်ဖြင့် အုတ်ဖိုမြို့နယ် ဝိုင်းရွာရဲစခန်းမှတဆင့် ဂမုန်းဆည် ကန့်နီကျေးရွာဘက်မှ ပဲခူးရိုးမလမ်းဟောင်းအတိုင်း စစ်ကြောင်းထိုးလာသည့် စစ်ကောင် စီတပ်ကို ရေးမြောင်ချောင်းကားလမ်းဟောင်းအနီး မိုင်းဆွဲတိုက်ခိုက်ခဲ့ခြင်း ဖြစ်သည်။
တိုက်ခိုက်မှုအတွင်း အပြန်အလှန်ပစ်ခတ်မှု နာရီဝက်ခန့်ဖြစ်ပွားခဲ့ပြီး စစ်ကောင်စီတပ်ဘက်မှ လေးဦးထက်မနည်းသေဆုံးကာ ဖမ်းဆီးခံထားရသော ရဲဘော်နှစ်ဦးအား အန္တရာယ်ကင်းစွာ ကယ်ထုတ်နိုင်ခဲ့ကြောင်း တပ်ခွဲ ၅ မှ တာဝန်ရှိသူတစ်ဦးက People’s Spring သို့ ပြောသည်။
“ကျွန်တော့်ရဲဘော်၂ ဦးကို ကယ်ရမဲ့ဗျူဟာလေးပေါ်လာတာနဲ့ သေချာဆုံးဖြတ်ချက်ချပြီး တိုက်ခဲ့တာဗျ”ဟု ၎င်းက ပြောသည်။
Public Service Announcement
စစ်ကောင်စီတပ်၏ ဖမ်းဆီးခြင်းကိုခံခဲ့ရသော တပ်ခွဲ ၅ ကြို့ပင်ကောက် Hero ပြောက်ကျားတပ်ဖွဲ့ဝင်ရဲ ဘော်နှစ်ဦးသည် ဇွန် ၅ ရက်က နယ်မြေကွင်းဆင်းစဥ် ကျောက်တံခါးမြို့နယ်အတွင်း ဖမ်းဆီးခံရခြင်းဖြစ်ပြီး ၎င်းရဲဘော်နှစ်ဦးအား စစ်တပ်က လမ်းပြအဖြစ်ခေါ်ဆောင်၍ ပဲခူးရိုးမအတွင်း စစ်ကြောင်းထိုးလာခြင်းဖြစ်သည်။
အထက်ပါတိုက်ခိုက်မှုတွင် စစ်ကောင်စီတပ်ဘက်မှ လက်နက်ကြီး လက်နက်ငယ်များဖြင့် ပြန်လည်ပစ် ခတ်ခဲ့သော်လည်း ရဲဘော်နှစ်ဦးအားကယ်တင်၍ အောင်မြင်စွာဆုတ်ခွာနိုင်ခဲ့ကြောင်း သာယာဝတီခရိုင် တပ်ရင်း ၃၈၀၁၊ တပ်ခွဲ ၅ ကြို့ပင်ကောက် Hero ပြောက်ကျားတပ်ဖွဲ့က အသိပေးထားသည်။
ပြီးခဲ့သည့် မေ ၃၀ ရက်ကလည်း အုတ်ဖိုမြို့နယ် ဝိုင်းရဲကင်းမှထွက်လာသော စစ်ကောင်စီတပ်စစ်ကြောင်းကို တပ်ခွဲ ၅ Hero ပြောက်ကျားတပ်ဖွဲ့က မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ နှစ်ဦးထက်မနည်း သေဆုံးခဲ့သည်။
