မြန်မာ့အရေး အာဆီယံရဲ့ ဘုံသဘောတူညီမှု ၅ ချက်မှာ ဖမ်းဆီးခံတွေလွှတ်ပေးရေးမပါ

မြန်မာ့အရေးအတွက် အာဆီယံက ကြားဝင် ဖြေရှင်းပေးဖို့ အဖွဲ့ဝင် နိုင်ငံတွေကြား ရရှိခဲ့တဲ့ ဘုံသဘောတူညီမှု ၅ ချက်ကို အာဆီယံ ဥက္ကဋ္ဌဖြစ်တဲ့ ဘရူနိုင်း နိုင်ငံက ကြေညာခဲ့ပါတယ်။

အစောပိုင်းမှာ မလေးရှား၊ အင်ဒိုနီးရှားနဲ့ စင်ကာပူ နိုင်ငံ ခေါင်းဆောင်တွေက သတင်းထောက်တွေနဲ့ တွေ့ဆုံရာမှာ အဲဒီ အချက် ၅ ခုကို မူအားဖြင့် ထုတ်နုတ် ပြောဆိုထားခဲ့ပြီးပါပြီ။ အနှစ်ချုပ် အနေနဲ့ အဲဒီ အချက်တွေကတော့

• မြန်မာနိုင်ငံမှာ ဖြစ်ပွားနေတဲ့ အကြမ်းဖက်မှုတွေ အားလုံး ချက်ချင်း ရပ်ဆိုင်းဖို့၊ အစုအဖွဲ့ အားလုံးက နောက်ထပ် အကြမ်းဖက်မှုတွေ ပေါ်ပေါက်မလာအောင် ထိန်းထိန်းသိမ်းသိမ်း လုပ်ဆောင်ကြဖို့

• မြန်မာ့နိုင်ငံရေးနဲ့ ဆက်နွှယ်တဲ့ အဖွဲ့အစည်းအားလုံး အပြုသဘောဆောင်တဲ့ ဆွေးနွေးမှုတွေ လုပ်ဆောင်ဖို့

• အာဆီယံရဲ့ အထူးကိုယ်စားလှယ် အဖွဲ့က မြန်မာ့အရေး ဆွေးနွေးမှုတွေ အထမြောက်စေဖို့ ကြားဝင် ညှိနှိုင်း ဆောင်ရွက်ပေးဖို့

• လူသားချင်း စာနာမှု အထောက်အပံ့ အစီအစဉ်တွေ မြန်မာဖက်က အမြန်ဆုံး လက်ခံပေးဖို့

• မြန်မာ့နိုင်ငံရေးနဲ့ ဆက်နွှယ်တဲ့ အဖွဲ့အစည်း အားလုံးနဲ့ အာဆီယံ ကိုယ်စားလှယ်တွေ တွေ့ဆုံကြဖို့ ဆိုတာတွေ ဖြစ်ပါတယ်။

အရှေ့တောင်အာရှ ၁၀ နိုင်ငံ စုစည်းထားတဲ့ အာဆီယံ အဖွဲ့ဟာ ပြည်တွင်းရေး ဝင်မစွက်တဲ့ မူဝါဒကို ကိုင်ဆွဲထားပေမယ့် မြန်မာ့ အရေးမှာတော့ ထူးခြားတဲ့ အခြေအနေ တစ်ရပ်အနေနဲ့ ဘုံသဘောတူညီမှုတွေ ညှိနှိုင်း ဖော်ထုတ်ခဲ့တာ ဖြစ်ပါတယ်။